سوودانی بڕیار دەدات لێکۆڵینەوە لە دۆسیەی کۆمپانیایەکی کوردستان بکات

ئاڤا نیوز

سەرۆکوەزیرانی عێراق، دەستەی دەستپاکی فیدراڵی ڕادەسپێرێت کار لەسەر دروستی ڕێکارەکانی وەزارەتی پەیوەندییەکان بکرێت بۆ دڵنیابوون لە حاڵەتەکانی پەیوەست بە بەقاچاخبردنی ئینتەرنێت لەلایەن کۆمپانیایەکی خزمەتگوزاریی ئینتەرنێتەوە کە لە هەرێمی کوردستان و عێراق کار دەکات.

وێنە گەورەکە: بەهۆی تازەکردنەوەی گرێبەستێک لەلایەن وەزیری پەیوەندییەکانی عێراق لەگەڵ کۆمپانیای IQ بۆ خزمەتگوزاریی ئینتەرنێت کە پێشتر لەلایەن خودی وەزارەتەوە کراوەتە لیستی ڕەش، داوای لێپێچینەوە لە وەزیری پەیوەندییەکانی عێراق دەکرێت.

ڕاگەیێنراوی فەرمی: نووسینگەی سەرۆکوەزیرانی عێراق بە ناوی باسم عەوادی، وتەبێژی سەرۆکوەزیران ڕایگەیاند: محەممەد شیاع سوودانی، سەرۆکوەزیرانی عێراق، داوای کردووە دەستەی دەستپاکی بە هەماهەنگی لەگەڵ لیژنەی دەستپاکی لە پەرلەمان دڵنیا ببنەوە لە ڕێکارەکانی وەزارەتی پەیوەندییەکان و بگەن بەو ئەنجامەی کە ئایا گرێبەستی نوێ لەگەڵ کۆمپانیای IQ بۆ خزمەتگوزاریی ئینتەرنێت کراوە یان نا.

لەلایەکی دیکە: لیژنەی پەیوەندییەکانی پەرلەمانی عێراق ئاشکرای دەکات، بەهۆی گرێبەستێکی گوماناوییەوە لێپرسینەوە لە وەزیری پەیوەندییەکان دەکرێت و ئەگەری لەکار دوورخستنەوەی هەیە.

ئەوەی پێویستە بیزانیت: پێشتر حەنان فەتلاوی، سەرۆکی بزووتنەوەی ئیرادە، ڕایگەیاندبوو، هویام یاسری، وەزیری پەیوەندییەکان جارێکی دیکە گرێبەستی لەگەڵ کۆمپانیایەک کردووە، توانای ئینتەرنێتی بە قاچاخ فرۆشتووە و زیانی نزیکەی 991 ملیار دیناری بەدەوڵەت گەیاندووە.

بۆچوونی لایەنی بەرامبەر: وەزارەتی پەیوەندییەکانی عێراق زانیارییەکانی پەرلەمانتار حەنان فەتلاوی ڕەتکردەوە و ڕایگەیاند: کۆمپانیاکە لە ساڵی 2010 گرێبەستێکی وەبەرهێنانی لەگەڵ وەزارەتەکەیان هەیە و تاوەکو ئێستا بەردەوامە.

ئای کیو چییە؟ کۆمپانیایەکی خزمەتگوزاریی ئینتەرنێتە، لە هەرێمی کوردستان کار دەکات و لە ساڵی 2005ـەوە فایبەر ئۆپتیکی دامەزراند بۆ دابینکردنی ئینتەرنێتێکی خێرا. ساڵی 2012، ئای کیو ئۆنلاینی لە شاری سلێمانی دامەزراند.