ئەمریکا: نابێت غەززە لەلایەن حەماسەوە بەڕێوەببرێت

ئاڤا نیوز

دوای جێبەجێکردنی قۆناغی یەکەمی ئاگربەستی غەززە و گەڕانەوەی بەردەوامی ئاوارە فەلەستینییەکان بۆ کەرتی غەززە، ئەمریکا داوا دەکات نابێت غەززە لە لایەن حەماسەوە بەڕێوەببرێت.

چیرۆکی سەرەکی: مارکۆ ڕوبیۆ، وەزیری دەرەوەی ئەمریکا، لەپەیوەندییەکی تەلەفۆنیدا لەگەڵ هاوتا میسرییەکەی، بەدر عەبدولعەتی، تاوتوێی دوایین پێشهاتەکانی پەیوەست بە کەرتی غەززە و دۆخی ناوچەکەیان کرد، ڕۆبیۆ ڕایگەیاندووە، ئەمریکا جەخت لەوە دەکاتەوە نابێت حەماس ببێتە هەڕەشە بۆسەر ئیسرائیل.

ڕاگەیێنراوی فەرمی: وەزارەتی دەرەوەی ئەمریکا لە ڕاگەیێنراوێکدا ڕایگەیاند "مارکۆ ڕوبیۆ پەیامی ئەمریکای گەیاندووەتە میسڕ کە ئەمریکا جەخت دەکاتەوە، نابێت حەماس کەرتی غەززە بەڕێوەببات و جەختیش دەکەینەوە حەماس نابێت ببێتە هەڕەشە لەسەر ئیسرائیل".

قووڵتر: ئەمریکا بەسەرۆکایەتیی دۆناڵد ترەمپ، لە نزیکەوە چاودێری دۆخی غەززە دەکات، نوێترین بیرۆکەشی گواستنەوەی دانیشتووانی کەرتی غەززەیە بۆ وڵاتانی ئوردن و میسر، بۆ ئەم بابەتەش ئەمریکا لەنزیکەوە لەسەر هێڵە لەگەڵ هەردوو وڵات.

لەلایەکی دیکەوە: لەسەر ئەم پرسە میدیاکانی ئەمریکا لەزاری دۆناڵد ترەمپەوە بڵاویانکردووەتەوە، ''ترەمپ پەیوەندی بە عەبدولفەتاح سیسی، سەرۆککۆماری میسرەوە کردووە و پێشنیازەکەی خستۆتەڕوو، بە ئەگەرێکی زۆرەوە پێدەچێت هەر یەکە لە میسر و ئوردن ئەم پلانەی ترەمپ پەسەند بکەن''، بەڵام میسر ڕەتیدەکاتەوە پەیوەندییەکی لەو جۆرە لەنێوان هەردوو سەرۆک ئەنجامدرابێت.

باکگراوند: دوای 15 مانگ لە شەڕ، ئاگربەستی نێوان ئیسرائیل و حەماس چووە بواری جێبەجێکردنەوە، بەڵام کەرتی غەززە بەجۆرێک وێران بووە کە ساڵانێکی زۆری دەوێت ئاوەدانبکرێتەوە.