ئەمریکا داوا لە میسر و ئوردن دەکات ڕێگە چارەیەک بۆ غەززە بدۆزنەوە

ئاڤا نیوز

ڕاوێژکاری تایبەتی دۆناڵد ترەمپ سەرۆکی ئەمریکا داوا لە میسر و ئوردن دەکات بۆ پەنابەرانی غەززە چارەسەرێکی گونجاو  بدۆزنەوە.

چیڕۆکی سەرەکی: دوای ئەوەی دۆناڵد ترەمپ، سەرۆکی ئەمریکا پلانی چۆڵکردن و ڕاگواستنی دانیشتووانی کەرتی غەززەی خستەڕوو، بۆ ئەو مەبەستەش داوای لە میسر و ئوردن کرد فەڵەستینییەکانی نیشتەجیێی غەززە بگوازنەوە وڵاتەکانیان، بەڵام هەردوو وڵات ئەم پێشنیازەی ترەمپیان ڕەتکردەوە.

لێدوانی فەرمی: ئادەم بویلەر، ڕاوێژکاری تایبەتی دۆناڵد ترەمپ سەرۆکی ئەمریکا بۆ کاروباری بارمتەکان ڕایگەیاند، دەبێت میسر و ئوردن ڕێگەچارەیەکی جێگرەوە پێشنیار بکەن کە پێیانوایە باشتر دەبێت ئەگەر نەیانەوێت پەنابەرانی فەلەستینی لە غەززە وەربگرن، ترەمپ کراوەیە بۆ هەر جۆرە چارەسەرێکی جیاواز، بەڵام مەرجە چارەسەرەکە ڕاستەقینە بێت.

لەلایەکی دیکەوە: عەبدولفەتاح سیسی سەرۆکی میسر، ڕاگواستنی گەلی فەڵەستینی بە ستەم ناوبرد، ئاماژەی بەوەکرد بەشداریی لەو پرۆسەدا ناکەن.

باکگراوند: بەهۆی 15 مانگی شەڕی نێوان ئیسرائیل و حەماس، کەرتی غەززە ڕووبەڕووی وێرانکارییەکی گەورە بووەتەوە و پلانەکەی ترەمپیش مەبەستی"پاککردنەوە"ـی کەرتی غەززەیە و ئەم ناوچەیەی بە شوێنكی وێران ناوبردووە.