یەکێتیی ئەوروپا بۆ ئاڤا: چاودێری جێبەجێکردنی یاسای بودجەی عێراق دەکەین

ئاڤا نیوز

ئەنوار ئەنونی، وتەبێژی یەکێتی ئەوروپا بە ئاڤای ڕاگەیاند، یەکێتیی ئەوروپا بەردەوام داوای باشترکردنی پەیوەندییەکانی نێوان بەغدا و هەولێری کردووە، پێویستە ڕێککەوتن سەبارەت بە جێبەجێکردنی بڕگەکانی پڕۆژەیاسای بودجە و زیادکردنی سەرچاوە پێویستەکانی داهات بکرێت.

وێنە گەورەکە: بە مەبەستی دەستپێکردنەوەی هەناردەی نەوتی هەرێمی کوردستان و دیاریکردنی خەرجی بەرهەمهێنان و گواستنەوەی نەوت، ڕۆژی یەکشەممە، 2-2-2025 پەرلەمانی عێراق دوای مشتومڕێکی چەند مانگی، هەمواری یاسای بودجەی پەسەندکرد.

لێدوانی فەرمی: ئەنوار ئەنونی بە ئاڤای ڕاگەیاند:

- یەکێتیی ئەوروپا بەردەوام داوای باشترکردنی پەیوەندییەکانی نێوان بەغدا و هەولێری کردووە و پێویستە ڕێککەوتن سەبارەت بە جێبەجێکردنی بڕگەکانی پڕۆژەیاسای بودجە و زیادکردنی سەرچاوە پێویستەکانی داهات بکرێت، لەم ڕوانگەیەوە یەکێتی ئەوروپا چاودێری هەموو پێشهاتەکان دەکات.

- یەکێتی ئەوروپا پێشوازی لە هەنگاوی ئەرێنی بەرەو ئاراستەی جێبەجێکردنی پڕۆژەیاسای بودجە دەکات و هانی هەموو لایەنەکان دەدات بە شێوەیەکی بنیاتنەر لە چارەسەرکردنی پرسە هەڵواسراوە درێژخایەنەکان بەشداری بکەن.

- یەکێتی ئەوروپا پەسەندکردنی هەمواری یاسای بودجە بە هەنگاوێکی باش دەزانێت، بەڵام هەنگاوەکانی داهاتوو بە هەمان شێوە گرنگن.

- پەیوەندییەکی سەقامگیر و کارا لە نێوان حکومەتی هەرێمی کوردستان و حکومەتی عێراق کلیلی سەقامگیری و خۆشگوزەرانی عێراق و ناوچەکەیە بەتایبەتی لە نێوان گۆڕانکارییە ناوچەییەکانی ئێستادا.

ئەوەی پێویستە بیزانیت: بڕگەی (ج) لە ماددەی 12ی یاسای بودجە کە پەرلەمانی عێراق دەنگی لەسەر هەموارکردنەوەیدا، ئەم بڕگانە لە خۆدەگرێت:

- وەزارەتی دارایی عێراق لە خەرجی سیادی قەرەبووی حکومەتی هەرێمی کوردستان دەکاتەوە لە دۆسیەی پەیوەست بە هەناردە و گواستنەوەی نەوت کە ڕادەستی کۆمپانیای بەبازاڕکردنی نەوتی عێراق (سۆمۆ) دەکرێت، هاوکات بەشێوەیەکی دادپەروەریش خەرجی هەناردە و گواستنەوەی نەوت لە هەر کێڵگەیەکی نەوتیدا دیاری دەکرێت.

- لایەنێکی ڕاوێژکاری هونەریی نێودەوڵەتی کە وەزارەتی نەوت بە هاوکاری وەزارەتی سامانە سروشتییەکانی هەرێمی کوردستان دیاری دەکات، لە ماوەی 60 ڕۆژدا خەرجی هەناردە و گواستنەوەی نەوتی هەرێمی کوردستان دیاری دەکات، ئەگەر لەو ماوەیەدا (دیاریکردنی لایەنەکە) جێبەجێ نەکرا، ئەنجوومەنی وەزیرانی عێراق ئەو لایەنە نێودەوڵەتییە دیاری دەکات.

- ئەرکی ئەو لایەنە نێودەوڵەتییە مەزەندەی تێچووی بەرهەمهێنان و گواستنەوەی نەوت دەبێت و ڕاپۆرتی خۆی دەداتە وەزارەتی نەوت و دارایی عێراق و حکومەتی هەرێمی کوردستان، لەسەر بنەمای ئەو ڕاپۆرتە وەزارەتی دارایی فیدراڵ پارە بۆ حکومەتی هەرێمی کوردستان دەنێرێت.

- دەستبەجێ هەناردەی نەوتی هەرێمی کوردستان ڕادەستی کۆمپانیای سۆمۆ بکرێت، تاوەکو مەزەندی بەرهەمهێنان و گواستنەوەی نەوتی هەرێمی کوردستانیش لەلایەن ئەو لایەنە ڕاوێژکارییە نێودەوڵەتییە تەواو دەکرێت، لەم قۆناغەدا وەزارەتی دارایی فیدراڵ بۆ بەرهەمهێنان و گواستنەوەی هەر بەرمیلێک نەوت 16 دۆلار خەرج دەکات.