ئەنجوومەنی وەزیران گفتوگۆ لەسەر مووچەی فەرمانبەران دەکات

ئاڤا نیوز

بڕیارە ئەمڕۆ چوارشەممە 2025-02-05، ئەنجومەنى وەزیرانی هەرێمی کوردستان بۆ تاوتوێکردنی مووچەی فەرمانبەران و بودجە و ژمارەیەک تەوەری دیکە کۆببێتەوە.

وێنە گەورەکە: بەسەرپەرشتی سەرۆکوەزیران مەسرور بارزانی، کۆبوونەوەی ئاسایی ئەنجوومەنی وەزیرانی هەرێمی کوردستان دەکرێت، لە کۆبوونەوەکە، مووچەی فەرمانبەران، مووچەی خانەنشینی و ڕاپۆرتی ئەو شاندەی هەرێمی کوردستان لە بەغدا گفتوگۆی لەسەر دەکرێت، هاوکات ڕادەستکردنی داهاتی ناوخۆ و پەسەندکردنی هەمواری یاسای بودجەی گشتیی عێراق تەوەری دیکەی گفتوگۆکان دەبێت.

زانیاریی زیاتر: دوای چەندین ساڵ لەبوونی گرفت لە بەردەم ناردن و نەناردنی مووچە و بودجەی هەرێمی کوردستان لەلایەن حکومەتی عێراقەوە، هەولێر و بەغدا گەیشتنە ڕێککەوتن، دوای پەسەندکردنی هەمواری یاسای بودجەش، وەزارەتی نەوتی عێراق هەوڵەکانی بۆ هەناردەکردنەوەی نەوتی هەرێمی کوردستان دەستپیکردووە.

ئەوەی پێویستە بیزانیت: لە ڕێکەوتی 2025-02-02، پەرلەمانی عێراق بە زۆرینەی دەنگی ئەندامان، دەنگی لەسەر هەمواری یاسای بودجەی گشتیی فیدراڵی و ماددەی 12ـی تایبەت بە هەناردەکردنەوەی نەوتی هەرێمی کوردستاندا، هاوکات دوێنێ سێ شەممە، بڕی 958 ملیار و 12 ملیۆن و 332 هەزار و 759 دینار بۆ مووچەی مانگی یەک خرایە سەر هەژماری وەزارەتی دارایی هەرێمی کوردستان و ئەمڕۆش دابەشکردنی مووچە دەستیپێکرد.