سەرۆکی ئەنجوومەنی پارێزگای بەغدا لە پۆستەکەی دووردەخرێتەوە

ئاڤا نیوز

بەتۆمەتی خراپ بەکارهێنانی پۆستە تایبەتییەکەی، بەزۆرینەی دەنگی ئەندامانی ئەنجوومەنی پارێزگای بەغدا، عەممار قەیسی لە پۆستی سەرۆکایەتیی ئەنجوومەنەکە دووردەخرێتەوە و سبەی شەممە سەرۆکێکی نوێ بۆ ئەنجوومەنەکە دیاری دەکرێت. 

وێنە گەورەکە: ئەنجوومەنی پارێزگای بەغدا دوای گفتوگۆ و ڕاوێژ لەگەڵ ئەندامانی لە دانیشتنێک نائاسایدا متمانەی لە عەممار قەیسی سەرۆکی ئەنجوومەنەکە سەنداوە، ئەمەش لە کاتێکدا بوو کە ناوبراو ئامادەی دانیشتنەکە نەبوو و تەنها هەڵسەنگاندن بۆ وەڵامدانەوەکانی پێشووتری کراوە.  

 

زانیاریی بەدەستهاتوو: سەرچاوەیەک لە ئەنجوومەنەکە ڕایگەیاندووە، ئەو تۆمەتانەی کە ئاڕاستەی سەرۆکی ئەنجوومەنەکە کراوە تایبەت بوو بە خراپ بەکارهێنانی دەسەڵات لەلایەن عەممار قەیسی، بۆیە بەزۆرینەی دەنگی ئامادەبووان و لەکۆی 41 ئامادەبوو بە دەنگی 40 ئەندام متمانەی لێ سەندرایەوە. 

 

بۆچوونی لایەنی بەرامبەر: دوای بڕیارەکەی ئەنجوومەنی بەغدا، عەممار قەیسی بڕیارەکەی بەنایاسایی ناوزەند کرد و باسی لەوەکردووە کە  پەنا بۆ دەسەڵاتی دادوەری دەبات. 

 

زانیاریی زیاتر: بە گوێرەی زانیارییە بەردەستەکان، کۆدەنگییەک لەنێوان سەرجەم فراکسیۆنەکانی ناو ئەنجوومەنەکە هەیە لەسەر دەستنیشانکردنی عەممار حەمدانی لە فراکسیۆنی تەقەدوم بۆ سەرکایەتیی ئەنجوومەنەکە.