ئەڵمانیا پاڵپشتی لە ئەحمەد شەرع دەکات

 

ئاڤا نیوز

ئەحمەد شەرع، سەرۆکی سووریا بۆ قۆناغی ڕاگوزەر پەیوەندییەکی تەلەفۆنی لەلایەن ئۆلاف شۆڵز، ڕاوێژکاری ئەڵمانیاوە پێگەیشت.

 

وێنە گەورەکە: لە پەیوەندییەکی تەلەفۆنی، ئۆلاف شۆڵز، ڕاوێژکاری ئەڵمانیا پیرۆزبایی لە ئەحمەد شەرع، سەرۆکی سووریا بۆ قۆناغی ڕاگوزەر کرد بە بۆنەی دەستبەکاربوونی لە پۆستی سەرۆکایەتی کۆماری سووریا.

زانیاری بەدەستهاتوو: ئاژانسی هەواڵی عەرەبی سووریا (سانا) بڵاویکردۆتەوە، لە پەیوەندییە تەلەفۆنییەکە، ڕاوێژکاری ئەڵمانیا دڵخۆشی خۆی دەربڕیوە بە نەمانی ڕژێمی ئەسەد و ڕزگارکردنی گەلی سووریا، هەروەها پشتگیری وڵاتەکەی بۆ ئەو هەنگاوانەی کە ئیدارەی نوێ لە ئاستی جەماوەری و سیاسیدا گرتوویانەتەبەر بە مەبەستی پاراستنی ئاشتی مەدەنی دەربڕی.

زانیاریی زیاتر: شۆڵز پشتیوانی وڵاتەکەی بۆ هەنگاوەکانی سەرۆکی سووریا ئەحمەد شەرع لە بەڕێوەبردنی دانوستانەکان بۆ تەواوکردنی یەکێتیی خاکی سووریا بە تایبەت لە ناوچەی باکووری ڕۆژهەڵاتی سووریا دەربڕی و دڵنیایی دایە ئەحمەد شەرع لە پاڵپشتی خۆی بۆ لابردنی گەمارۆ ئابوورییەکانی سەر سووریا.

ئەحمەد شەرع سوپاسی هەڵوێستەکانی ڕاوێژکای ئەڵمانیای کرد کە لە ساڵانی ڕابردوودا پاڵپشتی و پێشوازییان لە پەنابەرانی سووریا کرد، هەروەها شەرع و شۆڵز کارکردنی پێکەوەییان بۆ پاراستنی ئاسایش و سەقامگیری لە سووریا دووپات کردەوە و جەختیان لە پشتیوانیکردن لە پرۆسەی سیاسی سووریا و یەکێتیی و سەربەخۆیی و سەروەری خاکی وڵاتەکە کردەوە.