وەزیری دەرەوەی میسر سەردانی واشنتن دەکات

ئاڤا نیوز

 

بەگوێرەی وەزارەتی دەرەوەی میسر، بەدر عەبدولعاتی، وەزیری دەرەوەی ئەو وڵاتە بەرەو واشنتن بەڕێکەوتووە بۆ کۆبوونەوە لەگەڵ بەرپرسانی باڵای ئەو وڵاتە. 

 

بۆچی گرنگە: ئەم سەردانەی عەبدولعاتی لە کاتێکدایە میسر داوای کۆبوونەوەی بەپەلەی لووتکەی عەرەبی دەکات بۆ "کۆکردنەوەی پاڵپشتی ناوچەیی دژی پێشنیازەکەی ترەمپ بۆ چۆڵکردنی غەززە و ڕاگواستنی خەڵکەکەی".

 

ڕاگەیێنراوی فەرمی: وەزارەتی دەرەوەی میسر ڕایگەیاند، بەدر عەبدولعاتی، وەزیری دەرەوەی میسر ڕۆژی یەکشەممە بەمەبەستی وتووێژ لەگەڵ بەرپرسانی باڵای ئیدارەی نوێی ترەمپ و ئەندامانی کۆنگرێس سەردانی واشنتنی کردووە.

 

زانیاریی زیاتر: لە ڕاگەیێنراوەکەی وەزارەتی دەرەوەی میسر ئاماژە بەوە کراوە، ئامانجی سەردانەکە "بەرزکردنەوەی پەیوەندییە دووقۆڵییەکان و هاوبەشی ستراتیژی نێوان میسر و ئەمریکایە".