بازنەی ناڕەزایی بەرامبەر لێدوانەكەی نەتانیاهۆ فراوانتر دەبێت

ئاڤا نیوز

تا دێت كاردانەوەكان لەبارەی لێدوانەكانی سەرۆكوەزیرانی ئیسرائیل بە دامەزراندنی دەوڵەتی فەڵەستین لەسەر خاكی سعوودیە فراوانتر دەبێت و زۆربەی وڵاتانی عەرەبی سەركۆنەی دەكەن.

وێنە گەورەكە: بنیامین نەتانیاهۆ، سەرۆكوەزیرانی ئیسرائیل، لەمیانی سەردانەكەی بۆ ئەمریكا، لە لێدوانێكی ڕۆژنامەوانیدا وتی: سعودیە خاکێکی زۆری هەیە، با دەوڵەتێکی فەڵەستینی لەسەر خاکەکەی دروست بکات، ئەوەش دوای لێدوانی ترەمپ، كە ڕایگەیاندبوو، كۆنتڕۆڵی غەززە دەكەن و هاووڵاتیانی بۆ ئوردن و میسڕ دەگوازنەوە. بەهۆیەوە ناڕەزایی گەورەی وڵاتانی عەرەبی لێ كەوتەوە.

زانیاریی بەدەستهاتوو: هەریەك لە وڵاتانی سعوودیە، عێراق، بەحرەین، قەتەر، ئیماڕات و فەڵەستین و کۆمکاری عەرەبی سەركۆنەی لێدوانەكەی نەتانیاهۆ دەكەن و بەهەموو شێوەیەك پێشنیاری دروستكردنی دەوڵەتی فەڵەستین لەسەر خاكی سعودیە ڕەت دەكەنەوە.

كاردانەوەكان چین:

- وەزارەتی دەرەوەی شانشینی عەرەبستانی سعوودی ڕایگەیاند: "ئامانج ئەوەیە سەرنجەکان لەسەر تاوانەکانی ئیسرائیل لە غەززە لا بچێت و هەڵوێستی وڵاتانی عەرەبی و ئیسلامی لەسەر دۆزی فەڵەستین، بەرز دەنرخێنین".

- وەزارەتی دەرەوەی عێراق، وێڕای ڕەتكردنەوەی پلانی ئیسرائیل بۆ دامەزراندنی دەوڵەتی فەڵەستین لە سعودیە، لێدوانەکەی نەتانیاهۆ بە پێشێلکردنی ئاشكرای یاسای نێودەوڵەتی و پەیماننامەی نەتەوە یەکگرتووەکان، وەسف دەكات.

- هاوكات وەزارەتی دەرەوەی بەحرەین ئیدانەی لێدوانەكەی كرد و بە قسەیەكی نابەرپرسانە وەسفی كرد.

- مەحمود عەباس، سەرۆكی فەڵەستین ڕایگەیاند، پێشێلكارییەكانی ئیسرائیل بۆ سەر خاكی فەڵەستین، مایەی هەڕەشەیە بۆ سەقامگیری ئاسایشی نیشتمانیی وڵاتانی عەرەبی. دووپاتیشی كردەوە، هەڵوێستی سعوودیە و ئوردن و میسڕ بەرامبەر ڕاگواستنی ئاوارە فەلەستینییەكانی كەرتی غەززە نەگۆڕە.

- حكومەتی ئیماڕاتی دووپاتی دەكاتەوە، سەروەریی سعوودیە هێڵی سوورە و ڕێگە بەهیچ وڵاتێك نادەین ئەو سەروەرییە ببەزێنێت یاخود پێشێلی بكات.

- كۆمكاری عەرەبیش وێڕای سەركۆنەكردنی لێدوانەكەی نەتانیاهۆ، بە نابەرپرسانە گوزارشتی لێ كرد.