تەیف سامی نەسریەی سەرۆکایەتیی کۆماری دەبڕێت

ئاڤا نیوز

بە بیانووی خەرجی زیادە، وەزیری دارایی عێراق، نەسریەی سەرۆککۆمار و پاسەوانەکانی و ڕاوێژکارەکانی بڕیوە و سەرۆککۆماریش ناڕازییە.

چیرۆکی سەرەکی: لەم ماوانەی ڕابردوو، تەیف سامی، وەزیری دارایی عێراق نەسریەی لەتیف ڕەشید سەرۆککۆماری عێراق، هی خۆی و حیمایەکانی و راوێژکارەکانی بڕیوە کە چەندین ملیار دینارە. سەرۆککۆماریش ناڕازی بووە، نوێنەرێکی خۆی ناردووە بۆ لای تەیف سامی، تا بزانێت کێشەکە چییە.

زانیاریی زیاتر: نوێنەرەکەی لەتیف ڕەشید دەچێتە لای تەیف سامی و ئەویش پێی وتووە خەرجیتان زۆرە بۆیە بڕیومانە، نوێنەرەکەش بە ناوی سەرۆککۆمارەوە دەڵێت پێویستە لەو بڕیارە پەشیمان ببیتەوە. تەیف سامیش بە پێکەنینەوە دەڵێت، 'نەسرییەکەی ئێوەمان ناردووە بۆ مووچەی فەرمانبەرانی هەرێمی کوردستان'.

کاردانەوەکان: دوای ئەم قسانەی وەزیری دارایی عێراق، سەرۆککۆماری عێراق دەڵێت بە فەرمی سکاڵا لە دادگەی فێدڕاڵی تۆمار دەکەم، ئاڤاش بۆ پشتڕاستکردنەوەی هەواڵی سکاڵاکە پەیوەندی بە ڕاوێژکارێکی سەرۆکایەتی کۆمار کرد، گوتی ئاگاداری ئەو بابەتە نیم.