مەسرور بارزانی لەگەڵ ئەمینداری گشتیی ئەنجوومەنی ھاریکاری وڵاتانی کەنداو کۆبووەوە

ئاڤا نیوز

 

سەرۆکوەزیران مەسرور بارزانی، لەچوارچێوەی پەراوێزی دیدارەکانی لووتکەی جیهانی حکومەتەکان لە دوبەی، لەگەڵ جاسم محەممەد ئەلبدێوی ئەمینداری گشتیی ئەنجوومەنی ھاریکاری وڵاتانی کەنداو کۆبووەوە. 

 

ڕاگەیێنراوی فەرمی: حکومەتی هەرێمی کوردستان ڕایگەیاند، ئەمڕۆ سێشەممە، سەرۆکوەزیرانی حکومەتی هەرێمی کوردستان لە چوارچێوەی بەشداریکردنی لە لووتکەی حکومەتەکان لە دوبەی لەگەڵ جاسم محەممەد ئەلبدێوی، ئەمینداری گشتیی ئەنجوومەنی هاریکاری وڵاتانی کەنداو کۆبووەتەوە و چەند پرسێکیان تاوتوێ کردووە. 

 

زانیاریی زیاتر: لە کۆبوونەوەکەدا کە قوباد تاڵەبانی، جێگری سەرۆکی حکومەت ئامادە بوو، جەخت لە پێشخستنی زیاتری پەیوەندییەکانی هەرێمی کوردستان لەگەڵ وڵاتانی کەنداو کرایەوە، لەسەر بنەمای بەرژەوەندی هاوبەش و بە ئاراستەی گەشەپێدانی ناوچەکە.

 

ئەمەش بزانە: تەوەرێکی دیکەی کۆبوونەوەکە پەیوەست بوو بە گۆڕانکارییەکانی ناوچەکە و سووریا، هەردوولا هاوڕابوون لەسەر پاراستی سەقامگیریی و ئاسایشی ناوچە و ڕێزگرتن لە مافەکانی گەلی کورد و پێکهاتەکانی دیکەی وڵاتان.