نەتەوە یەکگرتووەکان پێشوازیی لە گفتوگۆکانی نێوان دیمەشق و هەسەدە دەکات

ئاڤا نیوز

نێردەی تایبەتی نەتەوە یەکگرتووەکان بۆ سووریا دەڵێت، پێشوازیی لە کردنەوەی کەناڵی گفتوگۆ لەنێوان دەسەڵاتی نوێی سووریا و هێزەکانی سووریای دیموکرات (هەسەدە) دەکات، داوای ڕاگرتنی گرژییەکانی باکوور و ڕۆژهەڵاتی سووریاش دەکات.

چیرۆکی سەرەکی: حکومەتی ڕاگوزەری سووریا و هەسەدە لە دوو مانگی ڕابردوو چەند جارێک دوور لە چاوی ڕاگەیاندن کۆبوونەتەوە، بەڵام لەسەر چۆنیەتی بەستنەوەی هەسەدە بە سوپای سووریا و داهاتووی ئیدارەی خۆسەر نەگەیشتوون بەڕێککەوتن.

لێدوانی فەرمی: گێر پێدرسۆن، نێردەی تایبەتی نەتەوە یەکگرتووەکان بۆ سووریا لە میانەی پێشکەشکردنی وتارێکدا لە کۆبوونەوەی ئەنجوومەنی ئاسایشی نێودەوڵەتی ئاماژەی بەوەکرد:

- شەڕ و پێکدادانەکان لە باکووری سووریا بەردەوامن و ئەوەش زیانی بە هاووڵاتیانی مەدەنیی و ژێرخانی ناوچەکانی دانیشتووان گەیاندووە.

- پێشوازیی لە کردنەوەی دەرگای گفتوگۆی ڕاستەوخۆ لەنێوان دەسەڵاتی نوێی سووریا و هەسەدە دەکەم، هەرچەندە ئەگەر تائێستاش پێشکەوتن لە گفتوگۆکاندا بەدی نەهاتبێت.

- لەگەڵ ئەمریکا و تورکیا و هاوبەشە هەرێمییەکان پێکەوە کاردەکەین بۆ دۆزینەوەی چارەسەرێک کە بتوانێت شەڕ ڕابگرێت و ئاشتی و ئاسایش بۆ باکوور و ڕۆژهەڵاتی سووریا دابین بکات.

- سوورییەکان چاوەڕێن لە ئیدارەی نوێی وڵاتەکەیاندا هەمەڕەنگی دانیشتووان ڕەچاو بکرێت.

- ترسێک هەیە کە لایەنە دەرەکییەکان دۆخی "پارچەبوون و لاوازی" لایەنەکانی سووریا بۆ بەرژەوەندی خۆیان بقۆزنەوە.