ڕوانگەی سووری: لە ماوەی دوو ڕۆژدا 140 جار گرێسپی و عەین عیسا بۆردومان کراون

 

 

ئاڤا نیوز

لە دوای ڕوخانی بەشار ئەسەد، بۆ یەکەم جار تورکیا و گرووپە چەکدارەکانی نزیک لەو وڵاتە لە سێ لاوە هێرشیان کردە سەر سێ ناوچەی جیاوازی ڕۆژئاوای کوردستان.

وێنە گەورەکە: ماوەی زیاتر لە دوو مانگە تورکیا و گرووپە چەکدارەکانی نزیک لەو وڵاتە بەچڕی هێزەکانی سووریای دیموکرات 'هەسەدە' لە بەنداوی تشرین و پردی قەرەقۆزاق بۆردوومان دەکەن و تا ئێستاش شەڕ لە نێوانیان دا بەردەوامە.

لێدوانی فەرمی: ڕوانگەی سووری بۆ مافەکانی مرۆڤ بڵاویکردەوە، تورکیا و گرووپە چەکدارەکانی نزیک لەو وڵاتە شاری عەین عیسا و گوندەکانی سارۆجە و ئیبراهیم کوردۆ و تل سەوانی ڕۆژئاوای گرێسپی یان بە چڕی بۆردوومان کردووە.

زانیاریی زیاتر: لە ئەنجامی ئەو بۆردومانەی گرێسپی دا، 9 چەکداری نزیک لە تورکیا کوژران و 10 چەکداری دیکەش بریندار بوون و ژمارەیەک ئەندامی هەسەدەش بریندار بوونە.

لە لایەکی دیکەوە: میدیاکانی ڕۆژئاوای کوردستان دەڵێن، تورکیا و چەکدارەکانی نزیک لەو وڵاتە لە دوێنێوە 140 جار گوندەکانی (مالحا، بیر حەسەن، خەسەق، دیکان، ئەل سانا، مالحا ئەلتینا، جادە، گردی سێڤێ  و بەرەی پردی قەرەقۆزاق)ـیان بە چەکی قورس، تانک، موشەک و هاوەن بۆردوومان کردووە.

ڕاگەیینراوی فەرمی: ناوەندی ڕاگەیاندنی هێزەکانی سوریای دیموکراتیک (هەسەدە) سەبارەت بە هێرش و شەڕ و پێکدادانەکانی بەنداوی تشرین ڕاگەیێندراوێکی بڵاوکردەوە کە بەمجۆرەیە:

٠ درۆنێکی خۆکوژیان لە نزیک بەنداوی تشرین خستۆتە خوارەوە.

٠ زیانی گیانی و ماددی بەر هێزەکانی هەسەدە کەوتووە.

٠ لە پردی قەرەقۆزاق ڕادارێکییان کردۆتە ئامانج.

٠ دەستگیراوە بەسەر ئۆتۆمبێلێکی سەربازی و هەندێک چەک.

باکگراوند: بەپێی ڕوانگەی سووری، لە ماوەی زیاتر لە دوو مانگی ڕابردوو 650 کەس لە بەنداوی تشرین و دەورووبەری و پردی قەرەقۆزاق کوژراون، لەو ژمارەیەش 480 کەسیان چەکداری نزیک لە تورکیا بوونە، ئەوانی دیکەش ئەندامی هێزەکانی هەسەدە و ژمارەیەکیشیان هاووڵاتی مەدەنی بوون.