بۆ مانەوەی یادگارییەکان لە شوێنی گوڵی سروشتی گوڵی دەستکرد بووەتە بژاردە

ئاڤا نیوز

ڤالانتاین یەکێکە لە ڕۆژە تایبەتەکان، خۆشەویستان و ئازیزان بە پێشکەشکردنی گوڵ پەیمانی خۆشەویست نوێ دەکەنەوە.

چیرۆکی سەرەکی: گوڵی ڕۆزی سوور بە سیمبولی خۆشەویستی ڤالانتاین دادەندرێت، بەڵام چی دەبێت ئەگەر خۆشەویستان بیانەوێت پارێزگاری لەو دیارییە بە بەهایە بکەن، چونکە تەمەنی گوڵی سروشتی کەمترە.

لێدوانە فەرمییەکان:

ئێلێنا ماکس، دامەزرێنەری کۆمپانیای گوڵفرۆشی

 

"لە ڕۆژی ڤالانتاین خواست بۆ کڕینی چەپکە گوڵ زۆر زیاددەکات، کە خۆشەویستان پێشکەش بە ئازیزانییان دەکەن. ئەوەش نەک تەنیا لە لایەن پیاوێکی نموونەییەوە کە بۆ هاوبەشەکەی بیکڕێت، بەڵکو ئافرەتانیش گوڵ و دیاری پێشکەش بە خۆشەویستان و ئازیزانییان دەکەن."

لیدیا دافیل، دامەزرێنەر و بەڕێوەبەری کۆمپانیای Everbloom London

"کاتێک یەکەمجار ڕووم لەو بوارە کرد، کە گوڵی حەریری یاخود دەستکرد دروستبکەم، هەمووان بە ئاماژەی برۆوە ڕەتیان دەکردەوە، دەیانگوت زۆر ناشیرنە و ساختەیە. بەڵام تەکنەلۆژیا زۆر گۆڕانکاری بەسەردا هاتووە. بۆیە کاتێک ئەو کەسەی ئەو گوڵە لە شوێنێک یان لە ماڵی هاوڕێیەکی، لە نووسینگەیەک یان فرۆشگایەک، تەنانەت ئاهەنگی بووک گواستنەوەش دەبینێت ڕووی تێدەکات. هاوکات ڕۆژنامەنووسانیش زۆر هاوکارییان کردووە. بە درێژایی سێ ساڵی رابردوو چەندین بۆچوون و ڕاپۆرت لەسەر کارەکەمان ئامادەکراوە. بابەتەکە تەنیا پەیوەستە بە کوالێتی، نەک تەنیا ڕەنگاوڕەنگی گوڵەکان."

زانیاریی زیاتر: ئێستا گوڵی دەستکرد بووەتە جێگرەوەیەکی گونجاوە هاوکات فڕێدانی ئەو هەموو گوڵە سروشتییەش هۆکارێکی دیکەی پیسکردنی ژینگەیە. تەنیا لە بەریتانیا بەهۆی ڤالانتاینەوە نزیکی نۆ ملیۆن کیلۆگرام پاشماوەی گوڵی سروشتی فڕی دەدەرێت. بۆیە فاوکس فلاوەرس یاخود گوڵی دەستکرد بووەتە جێگرەوە.

ژمارەکان وا دەڵێن: بە گوێرەی داتاکانی گراند ڤیو ریسێرچ، کە تایبەتە بە توێژینەوەی ڕاوێژی بازاڕ، پیشەسازی گوڵی دەستکرد لە جیهاندا بە نزیکەی 3 ملیار و 90 ملیۆن دۆلار لە 2024ـدا بەرزبووەتەوە، پێشبینی دەکرێت لەسەر ئاستی ساڵانەدا بە ڕێژەی سەدا 6.7 لە ساڵانی 2025 تاوەکو 2030 بەرزبێتەوە.