ئاڤا گەندەڵییەکی دیکەی بازگەکانی عێراق ئاشکرا دەکات

ئاڤا نیوز

هەر کارگەیەک لە کوردستان بۆ ناردنی کەلوپەلەکانی بۆ شارەکانی دیکەی عێراق باڵانسێکی هەیە و لە مانگێکدا بۆی هەیە 20 بارهەڵگر ڕەوانە بکات، بازگەکانی عێراق ڕێپێدانی ئەو کارگانەی کۆپی کردووە و بە تەزویر لەسەر حیسابی ئەوان بەرهەمیان ڕەوانە کردووە.

چیرۆکی سەرەکی: نزیکەی 5 مانگە لەلایەن بازگەکانی عێراقەوە ڕێگری لە چوونی بەرهەمی کارگەکانی هەرێمی کوردستان دەکرێت بۆ خواروو و ناوەڕاستی عێراق، بە بیانووی ئەوەی کە لە مانگی 8ـی ساڵی ڕابردوو بڕیارێک دەرچوو کە دەبێت هەموو کارگەکانی کوردستان دووبارە بچن و کارگەکانی خۆیان لە بەغدا تۆمار بکەن، دوای ئەوە لە کۆتایی مانگی 9ـەوە بڕیارەکە چووە بواری جێبەجێکردنەوە و ڕێگری کرا لە چوونی بەرهەم بۆ ئەوێ .

زانیاریی بەدەستهاتوو: عوبەید هەرکی پەیامنێری ئاڤا میدیا بەدواداچوونی بۆ ئەم بابەتە کردووە، دەرکەوتووە دۆخەکە زۆر ئاڵۆزترە لەوەی کە هەیە و کێشەکە گەورەترە .

زانیاریی زیاتر: بەشێکی خاوەن کارگەکان چوون و خۆیان تۆمارکردووە تاوەکو ڕێگری لە بەرهەمەکانیان نەکرێت، داواکارییەکانی بەغدایان جێبەجێکردووە ئێستا بەرهەمی خۆیان هەناردە دەکەن، بەڵام ئەو کارگانە هەر یەکەو باڵانسێکی هەیە ، بۆ نموونە کارگەیەکی شەربەت لە مانگێکدا بۆی هەیە 20 بارهەڵگر ڕەوانە بکات، ئەو باڵانسەیان لێ دەدزرێت و خۆشیان نەیانزانیوە.

بە قسەی بازرگانێک کە بۆ ئاڤا قسەی کردووە، بازگەکانی عێراق ڕێپێدانی ئەو کارگانەی کۆپی کردووە و بە تەزویر لەسەر حیسابی ئەوان بەرهەمیان بردووە و کەسیش نییە لێپێچینەوەیان لەگەڵ بکات.

هەر کۆمپانیایەک بیەوێت بەرهەمی خۆی هەناردەی عێراق بکات، یان دەبێت کۆدی پیشەسازی عێراقی هەبێت یان دەبێت 500 بۆ 600 دۆلار وەکو بەرتیل لە بازگەکانی مۆسڵ و کەرکووک بدات.

لێدوانی فەرمی:  نەوزاد شێخ کامیل، بەڕێوەبەری گشتی بازرگانی هەرێم بە ئاڤا میدیای ڕاگەیاند: ئێمە ئاگادار نەبووینە و دەبێت بەدواداچوون بۆ ئەم کەیسە بکرێت، دەشڵێت بڕیارە لیژنەیەکی هاوبەش لە کوردستان و بەغدا لەسەر پرسی ڕێگریکردن لە بەرهەمی کارگەکانی کوردستان پێک بهێنرێت.

ژمارەیەکی زۆر کارگەش بەهۆی ڕێگرییەکە بەرهەمهێنانیان کەمکردووەتەوە و چەند کارگەیەکیش کارەکانی خۆیان راگرتووە و قفڵیان لە دەرگاکەی داوە.