ئەم هاوینە تورکیا بەنیازی شەڕی یەکلاکەرەوەیە لەگەڵ پەکەکە

ئاڤا نیوز

تورکیا دەڵێت بۆ شەڕی پەکەکە و نەهێشتنی ئەو گرووپە چاوەڕوانی هاوینی ئەمساڵ بکەن، بۆ شەڕێکی یەکلاکەرەوەش دەستی بە ئامادەکاری کردووە.

چی ڕوودەدات: تورکیا ئامادەکاری دەکات بۆ ئۆپەراسیۆنێکی گەورە لە دژی گەریلاکانی پەکەکە لە نێو خاکی هەرێمی کوردستان، ئاماژەکان باس لەوە دەکەن بەرپرسانی تورکیا هەولێر و بەغدایان لەو ئۆپەراسیۆنە ئاگادارکردووەتەوە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕۆژی دووشەممە لە پرێس کۆنفرانسێکدا ڕایگەیاند، لەگەڵ عێراق لەسەر هێڵن و ئەم هاوینە بەهیوان کێشەی پەکەکە بەیەکجاری چارەسەر بکرێت.

 

لێدوانی بەرامبەر: فوئاد حوسێن، وەزیری دەرەوەی عێراق ڕۆژی شەممە لەمیانی کۆڕبەندی دیپلۆماسی ئەنتاڵیا ڕایگەیاند، پەکەکە تەنیا کێشە نییە بۆ تورکیا و کێشەیە بۆ عێراقیش.

 

زانیاریی تایبەت: بەپێی زانیارییەکانی ئاڤا نیوز، یەشار گولەر، وەزیری بەرگریی تورکیا لە دوایین سەردانیدا بۆ بەغدا و هەولێر، ئەو پەیامەی بۆ بەرپرسانی حکومەتی عێراق و هەرێمی کوردستان هێناوە کە تورکیا دەیەوێ هاوینی ئەمساڵ گورزێکی گەورە لە پەکەکە بووەشێنێ و شەڕی یەکلاکەرەوە دەکات.

 

ئەمەش بزانە: ڕۆژی یەکشەممە محەممەد شیاع سوودانی، سەرۆکوەزیرانی عێراق لەمیانی وتارێکی لە کۆڕبەندی ڕافیدەین لە بەغدا، پەسنی پەیوەندییەکانی بەغدا و ئەنکەرەی کرد و  گوتی: لە دوای سەردانەکەم بۆ تورکیا پەیوەندییەکانمان هەنگاوی باشی بڕیوە.

 

چاوەڕوانکراوەکان: ئەردۆغان بەنیازە پێش هاوین سەردانی عێراق بکات و پێشوەختیش هاکان فیدان، وەزیری دەرەوەی تورکیا سەردانی بەغدا دەکات.

 

قووڵتر: ئیبراهیم کاڵن، سەرۆکی دەزگای هەواڵگریی تورکیا دەچێتە ئەمریکا و لەگەڵ هاوتاکەی کۆدەبێتەوە، یەکێک لە مەلەفەکان باسی ئۆپەراسیۆنەکانیانە لە عێراق، لەگەڵ کڕینی چەکی نوێ و خێراکردنی ڕادەستکردنی فڕۆکەی ئێف 16.