حەماس: لە قۆناغی دووەم هەموو بارمتەکان بە یەکجار ئازاد دەکەین

 

ئاڤا نیوز

دوای ئەوەی ئەمڕۆ تەرمی چوار بارمتەی ڕادەستی ئیسرائیل کردەوە، حەماس بڕیاریدا لە هەنگاوی دووەمی ئاگربەستدا هەموو بارمتەکان ئازاد بکات.

چیرۆکی سەرەکی: ئەمڕۆ پێنجشەممە حەماس تەرمی چوار بارمتەی ڕادەستی ئیسرائیل کردەوە کە لەسەر سەکۆیەک نمایشی کردبوون. لە پشتی تەرمەکانەوە نووسیبووی" ئیسرائیل بەرپرسە لە کوشتنی ئەم بارمتانە".

ڕاگەیێنراوی فەرمی: تاهیر نونو، بەرپرسی باڵای بزووتنەوەی حەماس، بە ئاژانسی فرانس پرێسی ڕاگەیاند:

٠ حەماس نێوەندگیرییەکانی ئاگادارکردووەتەوە کە ئامادەیە هەموو بارمتەکان بە یەکجار لە قۆناغی دووەمی ڕێککەوتنەکەدا ئازاد بکات، بە پێچەوانەی قۆناغی یەکەم.

٠ "ئەم بڕیارە بۆ دووپاتکردنەوەی جددیەت و ئامادەیی تەواوی حەماسە بۆ پێشخستنی چارەسەری ئەو پرسە، هەروەها بەردەوامبوون لە هەنگاوەکان بەرەو چەسپاندنی ئاگربەست و گەیشتن بە ئاگربەستێکی بەردەوام" دراوە.

ئەمەش بزانە: وەزیری دەرەوەی ئیسرائیل لەم هەفتەیەدا دەستپێکی قۆناغی دووەمی دانوستانەکانی ئاگربەستی ڕاگەیاند.

باکگراوند: لە دوای دەستپێکردنی قۆناغی یەکەمی ئاگربەستی حەماس و ئیسرائیل لە 2025-01-19، نزیکەی 19 بارمتەی ئیسرائیلی لە بەرامبەر زیاتر لە هەزار و 100 زیندانی فەڵەستینی ئازاد کراون.