پڕۆژەی ڕووناکی دەنگۆیەک لەسەر کارەبای 24 کاتژمێری ڕەتدەکاتەوە

ئاڤا نیوز

پرۆژەی ڕووناکی کە مەبەست لێی دابینکردنی کارەبای 24 کاتژمێرییە بۆ هاونیشتمانیان، دەنگۆیەک لە بەکارهێنانی کارەبا ڕەتدەکاتەوە.

چیرۆکی سەرەکی: لە تۆرە کۆمەڵایەتییەکان چەند نرخێک لەسەر کارەبای 24 کاتژمێری و نرخی ئەمپێری بەکارهێنانی کارەباکە بڵاوکراوەتەوە، کە گومانی لای هاوڵاتییان درووست کردووە. ئاڤا میدیا بەدواداچوونی بۆ وردەکارییەکانی هەژمارکردنی پارەی هاوبەشان کردووە .

لێدوانی فەرمی: ڕێبین کامەران، بەرپرسی پەیوەندییەکانی پرۆژەی ڕووناکی بە ئاڤا میدیای ڕاگەیاند: پرۆژەی ڕووناکی بەپێی نرخی ئەمپێر کار ناکات، بەڵکو بەگوێرەی بەکارهێنان (کیلۆوات) کار دەکات، بەمەش وەرگرتنی پارە لە هاوڵاتییان، لەسەر چۆنیەتی بەکارهێنانە نەک نرخێکی دیاریکراو بۆ ئەمپێری کارەبا.

گوتیشی، ئەو دەنگۆ و ژمارانە ڕەتدەکەینەوە کە لە تۆڕەکۆمەڵایەتییەکان بڵاوکراوەتەوە و تێیدا نرخ و ئەمپێر بۆ کارەبای 24 کاتژمێری دیاری کراوە.

ئەوەی پێویستە بیزانیت: بە فەرمانی سەرۆكوەزیران مەسرور بارزانی، پڕۆژەی ڕووناكی لە تەواوی هەرێمی كوردستان جێبەجێ دەکرێت، بڕیارە تا ساڵی 2026، پرۆژەکە بگاتە تەواوی ناوچەکان.

بۆچی گرنگە: دوای ئەوەی پرۆژەی ڕووناکی جێبەجێ دەکرێت، سەدان مۆلیدەی گەڕەکەکان دەکوژێندرێنەوە، ئەمەش کاریگەری لەسەر پاکبوونەوەی ژینگەی هەرێمی کوردستان دەبێت.