پەرلەمانی عێراق بۆ هەڵبژاردنی سەرۆكێكی نوێ كۆدەبێتەوە

ئاڤا نیوز

سەرۆکی فراکسیۆنی پارتی دیموکراتی کوردستان، لە پەرلەمانی عێراق ڕایگەیاند، بە مەبەستی هەڵبژاردنی سەرۆکی نوێ، پێدەچێت هەفتەی داهاتوو ئەنجوومەنی نوێنەرانی عێراق کۆببێتەوە.

لێدوانی فەرمی: ڤیان سەبری، سەرۆکی فراکسیۆنی پارتی لە پەرلەمانی عێراق بە ئاڤا نیوزی ڕاگەیاند: دوای ئەوەی دادگەی فیدراڵی عێراق سکاڵاکانی پەیوەست بە کاندید بوونی شەعلان کرەیم و دانیشتنی یەکەمی هەڵبژاردنی سەرۆکی پەرلەمانی یەکلاکردەوە، چاوەڕوان دەکرێت لەم ڕۆژانەدا کە ڕەنگە هەفتەی داهاتوو بێت پەرلەمان لەبارەی هەڵبژاردنی سەرۆکەکەی کۆببێتەوە.

زانیاریی زیاتر: لایەنەکان چاوەڕوانی ڕێککەوتنی لایەنە سوننەکانن بۆ ئەوەی لەسەر کاندیدێک ڕێکبکەون.

بۆچی گرنگە: لە ڕۆژی 14-11-2023  دادگەی باڵای فیدراڵی عێراق لە بڕیارێکدا کۆتایی بە ئەندامێتی محەممەد حەلبووسی، سەرۆکی ئەنجوومەنی نوێنەرانی عێراق هێنا، لەوکاتەوە ئەنجوومەنەکە بێ سەرۆکە.