ترەمپ: پلانەکەم لە غەززە باشە بەڵام نایسەپێنم و تەنها پێشنیازی دەکەم

ئاڤا نیوز

ترەمپ لە بارەی پلانەکەی بۆ چۆڵکردنی غەززە دەڵێت پلانەکەی باشە، بەڵام نایەوێت بیسەپێنێت تەنها پێشنیازی دەکات.

وێنە گەورەکە: ترەمپ پلانی هەیە دانیشتوانی غەززە بۆ وڵاتانی دەوروبەر، بە تایبەتیش بۆ میسر و ئوردن، بگوازێتەوە و ڕێگەش نەدات جارێکی دیکە بۆ غەززە بگەڕێنەوە. هاوکات دەیەوێت غەززە بخاتە ژێر کۆنترۆڵی ئەمریکا. ئەم پلانەی ترەمپ لە سەر ئاستی نێودەوڵەتی بە شێوەیەکی فراوان ڕەت کراوەتەوە.

لێدوانی فەرمی: دۆناڵد ترەمپ، سەرۆکی ئەمریکا بۆ ڕادیۆی فۆکس نیوزی ئەمریکی قسەی کرد و ڕایگەیاند:

٠ ئەوە پلانی منە، پێم وایە ئەوە ئەو پلانەیە کە بەڕاستی کاردەکات، بەڵام من بە زۆری نایکەم، تەنها دادەنیشم و پێشنیازی دەکەم".

٠ شۆک بووم بە هەڵوێستی ئوردن و میسر سەبارەت بە پلانەکەم بۆ گواستنەوەی خەڵکی غەززە " ئێمە ساڵانە ملیاران دۆلار بە میسر و ئوردن دەدەین، من کەمێک تووشی شۆک بووم کاتێک ئەوەیان وت".

٠ غەززە شوێنێکی نایابە پێگەیەکی گرنگی هەیە نازانم بۆچی ئیسرائیل دەستبەرداری بووە.