ڕووسیا سەرکەوتن بەسەر ئۆکراینادا ڕادەگەیەنێت

ئاڤا نیوز

بە پێی زانیارییەکانی دەزگای هەواڵگریی ئۆکراینا، لە ساڵڕۆژی دەستپێکردنی جەنگی نێوان ڕووسیا و ئۆکراینا، مۆسکۆ سەرکەوتن ڕادەگەیەنێت.

وێنە گەورەکە: لە 2022-02-24، جەنگی نێوان ڕووسیا و ئۆکراینا دەستی پێکرد و سبەینێ ڕۆژی دووشەممە  تەمەنی جەنگی نێوان هەردوو دەوڵەت دەبێت بە 3 ساڵ و بە پێی زانیاریەکانی دەزگای هەواڵگریی ئۆکراینا، ڕووسیا پلانی ڕاگەیاندنی سەرکەوتنی هەیە.

بڵاوکراوەی فەرمی: دەزگای هەواڵگری ئۆکراینا لە بڵاوکراوەیەکی فەرمیدا ڕایگەیاند: بە پێی زانیارییە بەدەستهاتووەکان، ڕووسیا لە پێناو لاوازکردنی ئیرادەی گەلی ئۆکراینا و بڵاوکردنەوەی ترس و نیگەرانی لە وڵات، ئامادەکاری بۆ ڕاگەیاندنی "سەرکەوتن" لە ساڵڕۆژی دەستپێکردنی هێرشی دووژمنکارانەی مۆسکۆ بۆ سەر کیێڤ دەکات و ئەمەش واتای ڕاگەیاندنی سەرکەوتنی ڕووسیایە بە سەر ناتۆ و ئەوروپادا.

ئەوەی پیویستە بیزانیت: لە ئێستادا واشنتن و مۆسکۆ ئامادەکاری دەکەن بۆ کۆبوونەوەی نێوان دۆناڵد ترەمپ، سەرۆکی ئەمریکا و ڤلادیمێر پوتن، سەرۆکی ڕووسیا بۆ بڕیاردان لە سەر جەنگی نێوان ئۆکراینا و ڕووسیا و کۆتایهێنان بە جەنگەکە.