ترەمپ پێشکەشکارێک بۆ پۆستێکی باڵای ئەمنیی کاندید دەکات

ئاڤا نیوز

 

سەرۆکی ئەمریکا، پێشکەشکارێکی ڕادیۆیی بۆ جێگری بەڕێوەبەری نووسینگەی لێکۆڵینەوەی فیدڕاڵی (FBI) کاندید دەکات، دەستبەکاربوونیشی پێویستی بە دەنگدانی کۆنگرێس نابێت.

 

بۆچی گرنگە: بەشێک لە کاندیدەکانی ترەمپ بۆ پۆستە ئەمنییە باڵاکان پێشتر ڕاگەیاندنکار بوون، ئەوانەی دژی کاندیدەکان دەڵێن، کاندیدەکان ئەزموونی بەڕێوەبردنی پۆستەکانیان نییە، بۆیەش گومان لە سەرکەوتن و بەردەوامبوونیان دروستدەکەن.

 

لێدوانی فەرمی: دۆناڵد ترەمپ، سەرۆکی ئەمریکا لە هەژماری فەرمی خۆی لە تۆڕی کۆمەڵایەتی تروس ئاماژەی بەوەكردووە، دوای دەنگدانی ئەنجوومەنی پیران لەسەر دامەزراندنی کاش پاتێل بۆ پۆستی بەڕێوەبەری نووسینگەی ئێف بی ئای، دان بۆنگینۆش وەک جێگری پاتێل لە ئێف بی ئای دەستبەکاردەبێت.

 

دان بۆنگینۆ پێشتر لە دەزگای خزمەتی نهێنی ئەمریکا و پۆلیسی نیویۆرک کاریکردووە، بەم دواییانەش وەک پێشکەشکاری بەرنامەیەکی گفتوگۆ ئامێزی ڕادیۆیی کاریکردووە، ترەمپ دەڵێت، دان بۆنگینۆ پسپۆڕە لە جێبەجێکردنی یاسای و دادپەروەری ئەمریکیدا.