ئیسرائیل مەرج بۆ نوێژکردن لە مزگەوتی ئەقسا دادەنێت

ئاڤا نیوز

 

ئیسرائیل لە مانگی ڕەمەزاندا مەرج بۆ ئەو هاووڵاتییە فەلەستینییانە دادەنێت کە دەیانەوێت لەو مانگەدا سەردانی مزگەوتی ئەقسا بکەن و نوێژەکانیان لەو مزگەوتە بکەن. 

 

زانیاریی بەدەستهاتوو: میدیا ئیسرائیلییەکان بڵاویانکردەوە، ئیسرائیل لە مانگی ڕەمەزاندا ڕێگری لەو فەلەستینیانە دەکات کە لە ماوەی ڕابردوودا لە ڕێککەوتنی ئاگربەستی ئاڵوگۆڕکردنی بارمتەکان ئازادکراون بۆ چوونە ناو مزگەوتی ئەقسا بەمەبەستی بەجێ گەیاندنی ئەرکە ئاینییەکان. 

 

ئەوەی لەوبارەیەوە دەگوترێت: لە مانگی ڕەمەزاندا  ڕۆژانە سێ هەزار کارمەندی ئەمنی لە بازگەکانی بەرەو قودس و مزگەوتی ئەقسا جێگیر دەکات، تەنیا ڕێگە بە 10 هەزار فەڵەستینی دەدات بۆ چوونە ژوورەوەی مزگەوتەکە، ئەوانیش ئەو کەسانە دەبن کە تەمەنیان لە سەرووی 50 ساڵەیەوە.

 

ئەمەش بزانە: ساڵانە فەلەستینییەکان ڕووبەڕووی ڕێوشوێنی توندی ئیسرائیل دەبنەوە کە لە مانگی ڕەمەزاندا چوونە ژوورەوەیان بۆ مزگەوتی ئەقسا سنووردار دەکات ئەمەش لەکاتێکدایە کە ناکۆکییەکانی ناوچەکە زیاتر دەبن.

 

باکگراوند: مزگەوتی ئەقسا دووەم مزگەوتە لە دوای مزگەوتی حەڕەمی مەککەوە دروستکراوە، ڕووبەری مزگەوتەکە 14 هەزار مەتر چوارگۆشەیە، پێگەیەکی تایبەتی بۆ موسڵمانانی جیهان هەیە تەنانەت بۆ ئایینەکانی تری وەکو ئایینی مەسیحی و ئایینی جوولەکەکان شوێنێکی گرنگە و بەوهۆیەشەوە چەندان داگیرکاری و کێشە و پشێوی تێدا دروستبووە و تاوەکو ئێستاش بەردەوامی هەیە.