ئەنەکەسە: لە کۆنگرەی دیالۆگی سووریا بانگهێشت نەکراوین

ئاڤا نیوز

 

بڕیارە ئەمڕۆ سێشەممە لە دیمەشق کۆنگرەی دیالۆگی نیشتمانی سووریا بەبێ بەشداری کورد ئەنجام بدرێت، ئەنجومەنی نیشتمانی کوردانی سووریا (ئەنەکەسە) لە ڕاگەیێنراوێکدا هەڵوێستی کۆتایی خۆیان لەسەر بەشداری لە کۆنگرەکە ئاشکرا دەکەن.

 

چیرۆکی سەرەکی: ڕۆژی 29-1-2025 دوای ئەوەی لەلایەن تەحریرولشام، ئەحمەد شەرع وەک سەرۆکی عەرەبی سووریا هەڵبژێردرا، دەستوور و پەرلەمانی هەڵوەشاندەوە. لە پێناو نووسینەوەی دەستوورێک بۆ سووریا، بڕیاری کۆنگرەی دیالۆگی نیشتمانی سووریا درا، لە قۆناغی یەکەمدا قسە لەگەڵ زیاتر لە چوار هەزار کەسی شارەزای ئابووری، سیاسی، دەستووری و یاسایی کرا. ئەمڕۆ سێشەممەش لە دیمەشق کۆنگرەی دیالۆگی نیشتمانی سووریا بەبێ ئامادەیی کورد، دوروزییەکان و عەلوەییەکان بەڕێوە دەچێت.

 

ڕاگەیێنراوی فەرمی: ئەنجوومەنی نیشتمانی کوردانی سووریا (ئەنەکەسە)، شەوی ڕابردوو لە ڕاگەیێنراوێکدا هەڵوێستی خۆیان لەسەر بەشداری لە کۆنگرەکە ڕاگەیاند و ئەمانە خاڵە سەرەکییەکانی ڕاگەیێنراوەکەن.

 

-  ئەنەکەسە پاڵپشتی هەر هەوڵێک دەکات کە ببێتە هۆکاری کۆتاییهێنان بە ئازاری سووریەکان.

- پاڵپشتی لە دەوڵەتێک دەکەین کە لەسەر بنەمای لامەرکەزی و دیموکراسی بە بەشداری نەتەوە و ئاین و کولتوورە جیاوازەکان دروست بێت.

- جگە لە مافی پێکهاتەکان پێویستە بەپێی پەیماننامە نێودەوڵەتییەکان مافی کورد گرەنتی بکرێت.

- پەلە لە بەڕێوەچوونی کۆنگرەکە کراوە و پێکهاتەکان پەراوێزخراون.

- ئەو کوردانەی بانگهێشتی کۆنگرەکە کراون، بە شێوەی تاکە کەسی بووە، هیچ پێوەرێک ڕەچاو نەکراوە.