18 خاڵ لە کۆنگرەی نیشتمانی سووریا ڕاگەیێنرا

ئاڤا نیوز

بەبێ بەشداریی حیزب و لایەنەکانی ڕۆژئاوای کوردستان، کۆنگرەی نیشتیمانی سووریا کۆتاییهات و جەختکرایەوە کە هەر گرووپێک لە دەرەوەی دامەزراوەکان بمێنێتەوە بە "گرووپی دەرەوەی یاسا" هەژمار دەکرێت، ئیدارەی خۆسەری ڕۆژئاوای کوردستانیش ڕایگەیاند، پابەندی ڕاسپاردەکانی کۆنگرەکە نابێت.

وێنە گەورەکە: بە بەشداریی 600 کەسایەتی لە پارێزگا جیاوازەکان، سەرلەبەیانی ئەمڕۆ لە کۆشکی کۆماری لە دیمەشق، کۆنگرەی نیشتمانی سووریا دەستی بەکارەکانی کرد و ئێوارەی ئەمڕۆ کارەکانی کۆنگرەکە کۆتاییهات.
 
ئەوەی پێویستە بیزانیت: ڕاگەیێنراوی کۆتایی کۆنگرەی نیشتمانی سووریا لە 18 خاڵ پێکهاتووە و دەبن بە بنەما بۆ حکومڕانی داهاتوویی سووریا، دیارترین خاڵەکانیشی بریتیین:

- پاراستنی یەکێتیی خاکی کۆماری عەرەبی سووریا و ڕەتکردنەوەی هەموو پارچەکردن و دابەشکارییەکی خاکی وڵات یان دەستبەرداربوون لەهەر بەشێکی.

- بوونی چەک تەنیا لە دەستی دەوڵەت دەبێت و بونیادنانی سوپایەکی نیشتیمانی، هەر گرووپێکی چەکدار لە دەرەوەی دامەزراوە فەرمییەکان هەبێت بە گرووپی دەرەوەی یاسا هەژماردەکرێت.

- لەشکرکێشی ئیسرائیل بۆسەر خاکی سووریا سەرکۆنە دەکەین، داوای دەستبەجێ کشانەوەی ئیسرائیل دەکەین.

- لە ڕاگەیاندنی (دەستووری کاتی، لیژنەی نوسینەوەی دەستووری هەمیشەیی، پێکهێنانی ئەنجوومەنی یاسادانانی کاتی) پەلە بکرێت، بە جۆرێک بنەماکانی دادپەروەریی و ئازادیی و یەکسانی بەهێزتر بکات.

- ڕێزگرتن لە مافەکانی مرۆڤ، پشتیوانی ڕۆڵی ئافرەتان لە هەموو بوارەکان، پارێزگاری لە مافی منداڵان و بەهێزکردنی ڕۆڵی گەنجان لە دەوڵەت و کۆمەڵگادا.

- بەهێزکردنی بنەمای پێکەوەژیان لەنێوان پێکهاتەکانی سووریا و ڕەتکردنەوەی هەموو جیاکارییەک لەسەر بنەمای ڕەچەڵەک و مەزهەب و ئاین.

- داوای هەڵگرتنی سزاکانی سووریا دەکەین.

- بەدیهێنانی گەشەپێدانی سیاسیی بەجۆرێک گەرەنتی بەشداریی هەموو پێکهاتەکانی کۆمەڵگا بکات.

- چاکسازیی لە دامەزراوەکان و بەئەلیکترۆنییکردنی کاروبارەکان.

- گەشەپێدانی ئابووری و کەرتەکانی کشتوکاڵ و پیشەسازیی و هاندانی وەبەرهێنان و پاراستنی مافەکانی وەبەرهێنەر.

بە تەنیشت ئەم بابەتە: ئیدارەی خۆسەری هەرێمی باکوور و ڕۆژهەڵاتی سووریا لە ڕاگەیێنراوێکدا دەڵێت، "کۆنگرەی نیشتیمانی سووریا بەو شێوەیەی ئەمڕۆ بەڕێوەچوو، جێگەی نیگەرانییە و دوورە لە هەموو ئەو چاوەڕوانییانەی سوورییەکان هەیانبوو، ئەمڕۆش نوێنەرانی ڕاستەقینەی گەل لەو کۆنگرەیە بەشدارنەبوون و ئەوەی کراوە پەراوێزخستنە، جەختیش دەکەینەوە کە ئەم کۆنگرەیە نوێنەرایەتیی گەلی سووریا ناکات و پابەندی ڕاسپاردەکانی نابین".