حەماس تەرمی 4 هاوڵاتی ئیسرائیل ڕادەستدەکاتەوە

 

ئاڤا نیوز

بزووتنەوەی حەماس ڕایگەیاند، ڕۆژی پێنج شەممە تەرمی 4 هاوڵاتی ئیسرائیل لەگەڵ دیلە فەڵەستینییەکان ئاڵوگۆڕپێدەکەن و کۆتاییان بە گفتوگۆکانیان لە قاهیرە لەسەر ڕێککەوتنی ئاگربەست هێناوە.

وێنە گەورەکە: ئازادکردن و ئاڵوگۆڕپێکردنی دیل و بارمتەکان بەشێکە لە ڕێککەوتنی ئاگربەستی غەززە، تا ئێستا ژمارەیەکی زۆر لە بارمتەی ئیسرائیلی ئازادکراون، لەگەڵ ئەوەشدا چەندین تەرم ڕادەست کراونەتەوە.

لێدوانی فەرمی: سەرچاوەیەک لە بزووتنەوەی حەماس بە میدیا عەرەبییەکانی ڕاگەیاند:

٠ ڕۆژی پێنج شەممە تەرمی 4 هاوڵاتی ئیسرائیل لەگەڵ دیلە فەڵەستینییەکان ئاڵوگۆڕ پێدەکەین.

٠ شاندێكی حەماس بە سەرۆکایەتیی خەلیل حەیای سەرۆکی بزووتنەوەی حەماس لە کەرتی غەززە، دوای زنجیرەیەک دیدار لەگەڵ بەرپرسانی میسر، کۆتایی بە سەردانەکەیان بۆ قاهیرە هێنا، کە تێیدا ڕەوتی جێبەجێکردنی ڕێککەوتنی ئاگربەست و ئاڵوگۆڕی زیندانییەکان و دانوستانەکان بۆ دەستپێکردنی قۆناغی دووەم تاوتوێ کران.

٠ شاندەکە جەختی لە پێویستی پابەندبوونی تەواو و ورد بە مەرجەکانی ڕێککەوتنەکە و هەموو قۆناغەکانی کردووەتەوە.

٠ ڕێککەوتن لەسەر چارەسەرکردنی کێشەی دواخستنی ئازادکردنی زیندانیانی فەڵەستینی کراوە کە دەبوو لە دوایین وەجبەدا ئازاد بکرانایە.

لەلایەکی دیکەوە: کەناڵ 13ـی ئیسرائیلی لە زاری بەرپرسێکی ئیسرائیلی کە نەیویستووە ناوی ئاشکرا بکرێت ڕایگەیاندووە، "نێوەندگیریی میسری سەرکەوتوو بووە لە بەدیهێنانی پێشکەوتن لە ڕێککەوتنی ئاگربەست و پێشبینیش دەکرێت لە سەعاتەکانی داهاتووی شەودا تەرمی ئەو زیندانیانە ڕادەست بکرێنەوە، و لە هەمان کاتیشدا زیندانییە فەڵەستینییەکان لە زیندانەکانی ئیسرائیل ئازاد دەکرێن، بۆ ئەم مەبەستەس لێکتێگەیشتن هەیە، مەگەر لە کۆتا خولەکدا گۆڕانکارییەک ڕووبدات.