هەڕەشەی تووند لە ئەردۆغانەوە: پەکەکە فێڵمان لێ بکەن بەرد لەسەر بەرد ناهێڵین

ئاڤا نیوز

ئەدرۆغان لە نوێترین لێدوانیدا لەدوای ڕاگەیاندنی ئاگربەست لەلایەن پەکەکە، هەڕەشە دەکات و ڕایدەگەیێنێ، ئەگەر پەکەکە فێڵیان لێ بکەن یاخود بە بەڵێنەکانیان پابەند نەبن، ئەوا هێرشی تووند دەکەن سەریان و دار لەسەر بەرد ناهێڵن.

وێنە گەورەکە: لەدوای گۆڕانکارییە خێراکانی ڕۆژهەڵاتی ناوەڕاست وەکو شەڕی غەززە و لوبنان و ڕووخانی بەشار ئەسەد، جارێکی دیکە دەرفەتێک بۆ پرۆسەی ئاشتی لە باکووری کوردستان و تورکیا هاتووەتە پێشەوە، ئۆجەلان و پەکەکەش دەستپێشخەرییەکەیان قبووڵ کردووە و باشوور و ڕۆژئاوای کوردستانیش پشتیوانی لە سەرگرتنی پرۆسەکە دەکەن.

لێدوانی فەرمی: ڕەجەب تەیب ئەردۆغان دەڵێت: تورکیا بەهێزترین و بەتواناترین وڵاتی جیهانە لە بەرەنگاربوونەوەی تیرۆر لە سنوورەکانی تورکیا و دەرەوەی سنوورەکان.

٠ ئەگەر پێویست بکات بەردەوام دەبین لە ئۆپەراسیۆنە بەردەوامەکانمان تاوەکو دوایین تیرۆریست لەناو دەبەین، بەرد لەسەر بەرد و سەر لەسەر شان ناهێڵین.

٠ ئەگەر بەڵێنەکان جێبەجێ نەکرێن ئۆپەراسیۆنەکان دژی پەکەکە دەستپێدەکەینەوە.

٠ ئەوانەی ساڵانێکە ئەم میللەتە دەخۆن دۆڕاون، براوە 85 ملیۆن هاووڵاتی و دیموکراسی و ئابووری و برایەتیمان دەبێت.

٠ جگە لە هەندێک گروپی پەراوێزخراو، دەستپێشخەریی تورکیا بە نەهێشتنی تیرۆر لەلایەن زۆرینەی ڕەهای میللەت و سیاسییەکانەوە پێشوازی و پشتیوانی لێ کرا.

باکگراوند: کاتژمێر 5ـی ئێوارەی ڕۆژی 27ـی شووبات، ئۆجەلان لە پەیامێکیدا بانگەوازی  چەکدانان و خۆهەڵوەشاندنەوەی لە پەکەکە کرد، پەکەکەش ڕایگەیاند پابەند دەبن بە داواکارییەکەی ئۆجەلان و جێبەجێی دەکەن و شەڕ ڕادەگرن، ئەگەر هێرش نەکرێتە سەریان هیچ هێرشێک ناکەن. لەبارەی داواکاری دووەمیش ڕایگەیاند  ئامادەن بۆ بەستنی کۆنگرە و خۆهەڵوەشاندنەوە، بەڵام دەبێت ئۆجەلان خۆی کۆنگرەکە بەڕێوەببات.