ئیسرائیل ڕێگە بە چوونە ژوورەوەی هاوکارییە مرۆییەكان بۆ غەززە نادات

ئاڤا نیوز

 

لەگەڵ تەواوبوونی قۆناغی یەکەمی ئاگربەستی غەززە کە ماوەی 42 ڕۆژی خایاند، بنیامین نەتانیاهۆ، سەرۆکوەزیرانی ئیسرائیل بڕیاریدا چی دیکە ڕێگە نەدرێت هاوكارییە مرۆییەكان ڕەوانەی غەززە بکرێن.

 

ڕاگەیێنراوی فەرمی: نووسینگەی بنیامین نەتەنیاهۆ سەرۆکوەزیرانی ئیسرائیل ڕایگەیاند، لەگەڵ تەواوبوونی قۆناغی یەکەمی ئاگربەستی غەززە، ئیسرائیل هەموو هاوکارییە مرۆییەکان بۆ غەززە ڕادەگرێت، هاوکات ڕێگە بە ئاگربەست نادات بەبێ ئازادکردنی دیلەکان، ئەگەر حەماس بەردەوام بێت لە ڕەتکردنەوەی ئازادكردنی ڕفێنراوەکان، ئەوا کاریگەری و لێكەوتەی دیکەی بەدواوە دێت .

 

بۆچوونی لایەنی بەرامبەر: بزووتنەوەی حەماس لەبەرامبەر ئەم بڕیارەی ئیسرائیل ناڕەزایەتیی دەردەبڕێت و ڕایگەیاند، ڕێگریکردن لە هاتنە ناوەوەی یارمەتییەکان، پابەندنەبوونە بە بەڵێنەکان و خۆدزینەوەیە لە ئەرکەکانی ڕێککەوتنی غەززە.

 

ئەوەی لەبارەیەوە دەگوترێت: سەرچاوە میدیاییەکان باس لەوە دەکەن، ئەم بڕیارەی ئیسرائیل بەهاوبەشی لەگەڵ ئەمریکا دراوە.

 

باکگراوند: ئاگربەستی غەززە لەنێوان ئیسرائیل و حەماس لە 19-1-2025 کەوتە بواری جێبەجێکردنەوە بەنێوەندگیری ئەمریکا، میسر و قەتەر. ڕێککەوتنە سێ قۆناغ لەخۆدەگرێت، هەر قۆناغێکیش 42 ڕۆژ دەخایەنێت.