بە دروستكردنی دوو پاركی مۆدێرن ڕێژەی سەوزایی هەولێر بەرزدەكرێتەوە

ئاڤا نیوز

بەپێی گوتەی وەزیری شارەوانی و گەشتوگوزاری هەرێمی كوردستان، هەردوو پڕۆژەی مۆدێرنی پاركی ڕەشكین و سەوزكردنی یەكتربڕینی شەقامی 120 مەتری، هەنگاوی باشی بڕیوە و لەماوەی دیاریكراوی خۆیدا تەواو دەكرێن.

وێنە گەورەكە: لەچوارچێوەی پلانی زیادكردنی ڕێژەی سەوزایی لە هەرێمی كوردستان، لە مانگی ئایاری ساڵی ڕابردوو، لەسەر فەرمانی سەرۆكوەزیران مەسرور بارزانی، بەردی بناغەی دوو پڕۆژەی گرنگ دانران كە پێكهاتوون لە پڕۆژەی مۆدێرنی پاركی ڕەشكین كە لەسەر ڕووبەری 120 هەزار مەتر دووجا و بە تێچووی 15 ملیار دینار، جێبەجێ دەكرێت، هەروەها پڕۆژەی سەوزكردنی یەكتربڕیی شەقامی 120 مەتری لە چوارڕیانی هەولێر - موسڵ كە لەسەر ڕووبەری 205 هەزار مەتر دووجا بە تێچووی سێ ملیار و 422 ملیۆن دینار جێبەجێ دەكرێت.

لێدوانی فەرمی: ساسان عەونی، وەزیری شارەوانی و گەشتوگوزار، لەمیانی بەسەركردنەوەی مەیدانی هەردوو پڕۆژەكە ڕایگەیاند، كارەكانی هەردوو پڕۆژە بەباشی بەڕێوەدەچێت و هەنگاوی زۆر باشی بڕیوە، هەوڵدەدرێت لەماوەی دیاریكراوی خۆیدا تەواوبكرێت و هەولێر ببێتە خاوەنی دوو پاركی دیكەی نموونەیی.

ئەوەی پێویستە بیزانیت: پرۆژەی پاركی ڕەشكین، پەرژینكردن بە درێژایی هەزار و 600 مەتر و گەراجی ئۆتۆمبێل و كافتریا و ڕێڕەوی پایسكلسواری و دوو عەمباری ئاو و چاندنی دەیان هەزار درەخت لەخۆدەگرێت، هاوكات پرۆژەی سەوزكردنی یەكتربڕیی شەقامی هەولێر - موسڵ، چاندنی 30 هەزار دار و 10 هەزار گوڵ و نەمام لەخۆدەگرێت و خەزانی كۆكردنەوەی ئاو و دانانی سیستمی ئاودێری بۆ ئاودانی ناوچە سەوزاییەكە، لەخۆدەگرێت.