جەواد زەریف دەستی لەکار کێشایەوە

 

ئاڤا نیوز

بە گوێرەی هەواڵەکانی میدیای ئێران، محەممەد جەواد زەریف دەستی لە پۆستی یاریدەدەری سەرۆککۆماری ئێران بۆ کاروباری ستراتیژی کێشایەوە. 

وێنە گەورەکە: زەریف لە گۆڕەپانی نێودەوڵەتیدا ناسراوە، ئەمەش بەهۆی ئەو ڕۆڵە دیارەی کە لە دانوستانەکاندا بینی، کە بووە هۆی ئەنجامدانی ڕێککەوتنی بەرنامە ئەتۆمییەکەی ئێران لە ساڵی 2015ـدا. بەوە ناسراوە کە لایەنگری سەرسەختی رێککەوتنی ئێرانە لەگەڵ ئەمریکا، هاوکات لەگەڵ دەستبەرداربوونی ئێرانە لەدۆسیەی ئەتۆمی و دورکەوتنەوە لە پشتیوانیکردنی بەرەی مقاوەمەی ئیسلامی.

هۆکارە زانراوەکان: بە گوێرەی ئاژانسی هەواڵی فارسی ئێران لە زاری دوو سەرچاوەوە ئاشکرای کردووە: دەستلەکارکێشانەوەی زەریف دوابەدوای دوورخستنەوەی عەبدولناسر هیمەتی، وەزیری ئابووری و دارایی دێت لە دانیشتنی ئەمڕۆی پەرلەمان و دانانی ڕەحمەتوڵڵا ئەکرەمی لە شوێنەکەی بە وەکالەت.

باکگراوند: پزیشکییان ڕۆژی یەکی ئابی ساڵی ڕابردوو، محەممەد جەواد زەریفی وەک جێگری سەرۆککۆمار بۆ کاروباری ستراتیژی دەستنیشان کرد و بەرپرسیارێتی ناوەندی لێکۆڵینەوەی ستراتیژیی سەرۆکایەتیی پێسپارد.

ئەمەش بزانە: ئەمە جاری دووەمە، زەریف دەستلەکارکێشانەوەی خۆی پێشکەش دەکات، دوای دوو هەفتە لە دەستبەکاربوونی، دەستلەکارکێشانەوەی خۆی پێشکەش کرد و نائومێدی خۆی بەرامبەر پێکهێنانی حکومەت دەربڕی لە دانانی ژمارەیەک وەزیر، بەڵام لە 28ـی ئابی 2024 بڕیاری دا بگەڕێتەوە سەر ئەرکەکەی.