ئاڤا بەدواداچوون بۆ گرفتی پاداشتی کۆتایی خانەنشینانی پێشمەرگە دەکات

ئاڤا نیوز

بەشێکی زۆر لەو پێشمەرگانەی خانەنشین کراون و دەرماڵەی خانەنشینییان وەرنەگرتووە، بەڕێوەبەرایەتیی گشتیی خانەنشینی هەرێمی کوردستان لەوبارەیەوە دەڵێت، "تاوەکو ئێستا فایلی پێشمەرگەمان بۆ نەهاتووە".

وێنە گەورەکە: تاوەکو ئێستا نزیکەی شەش هەزار پێشمەرگەی خانەنشینکراو دەرماڵەی خانەنشینییان وەرنەگرتووە، لە ڕێگەی ئاڤاوە داوا دەکەن سۆراخی بابەتەکە بکرێت و هۆکارەکەیان بۆ بخرێتەڕوو کە بۆچی بۆیان خەرج ناکرێت.

زانیاری تایبەت: سەرچاوەیەکی باڵا لە بەڕێوەبەرایەتیی گشتیی خانەنشینی هەرێمی کوردستان، بە ئاڤا میدیای ڕاگەیاند: تاوەکو ئێستا فایلی پێشمەرگەمان بۆ نەهاتووە، دەبێت لەگەڵ ئەنجوومەنی وەزیران لەسەر شێوازێک بۆ خەرجکردنی ئەم پاداشتە ڕێکبکەوین، دواتر بە هاوئاهەنگی لەگەڵ وەزارەتی پێشمەرگە و ئەنجوومەنی وەزیران ڕێنمایی پێ دەربکەین.

ئەوەی پێویستە بیزانیت: ئەو خانەنشینانەی پێشمەرگە کە لە 2014 تاوەکو 1-12-2024 پاداشتی کۆتایی ڕاژەیان وەرنەگرتووە، نزیکەی شەش هەزار کەسن و بڕی زیاتر لە 52 ملیار دینار بۆ خەرجکردنی پاداشتەکەیان دەبێت دابین بکرێت.