ڕاوە ماسی لە هەرێمی کوردستان قەدەغە دەکرێت

ئاڤا نیوز

وەزارەتی کشتوکاڵ و سەرچاوەکانی ئاو ساڵانە وادەی قەدەغەی ڕاوە ماسی لە هەرێمی کوردستان ڕادەگەیێنێت، بەهۆی دانانی گەرا و زاوزێی ماسی.

چیرۆکی سەرەکی: قەدەغەکردنی ڕاوە ماسی لە هەرێمی کوردستان، بە ماوەی دانانی گەرای ماسی و ماوەی زیادبوونی سامانی زیندەوەرەکە هەژمار دەکرێت، حکومەتی هەرێمی کوردستان ساڵانە نزیکەی سێ مانگ ڕاوەماسی قەدەغە دەکات، تاوەکو پارێزگاری بکات لە مانەوە و زیادبوونی ماسی لە ڕووبارەکان.

لێدوانی فەرمی: بێستوون نەجمەدین، بەڕێوەبەری گشتیی سامانی ماسی لە وەزارەتی کشتوکاڵ، بە ئاڤا میدیای ڕاگەیاند، وادەی قەدەغەی ڕاوە ماسی لە هەرێمی کوردستان، لە دووشەممەی داهاتوو 2025-03-10، دەچێتە بواری جێبەجێکردن و هەرکەسێک پابەند نەبێت ڕووبەڕووی سزای توند دەبێتەوە، هاوکات بڕیارەکە تا 2025-06-20، بەردەوام دەبێت، هەموو جۆرەکانی ڕاوکردن، وەک؛ کارەبا، ماددە ژەهراوییەکان، ماددە تەقەمەنییەکان، تۆڕی کون و ورد کە ببێتە هۆی لەناوبردنی زیندەوەرانی بە کۆمەڵی ئاوی قەدەغەیە و بکەرانی پێبژاردنیان بۆ دەکرێت، یان زیندانی دەکرێن.

زانیاریی زیاتر: بێستوون نەجمەددین، دەڵێت، ساڵانە وەزارەتی کشتوکاڵ 500 هەزار تا 750 هەزار پەنجە ماسی دەکاتە ناو ڕووبارەکان، بۆ ئەوەی بەردەوام ماسی زیاد بێت و لەناو نەچێت، لە ماوەی ڕابردوو چەندین کەس دەستگیرکراون و سزا دراون، بەهۆی ئەوەی پابەند نەبوونە بە ڕێنماییەکان.