ئیسرائیل ڕەخنە لە دەرئەنجامی لووتکەی عەرەبی دەگرێت

 

ئاڤا نیوز

دوای بەڕێوەچوونی کۆبوونەوەیەکی بەپەلەی لووتکەی وڵاتانی عەرەبی کە تایبەت بوو بە پێشهاتەکانی دۆخی غەززە، ئیسرائیل ڕەخنە لە دەرئەنجامەکانی ئەم کۆبوونەوەیە دەگرێت.

چیڕۆکی سەرەکی: دوای ئەوەی دۆناڵد ترەمپ، سەرۆکی ئەمریکا پێشنیازی گواستنەوەی خەڵکی غەززەی بۆ وڵاتانی میسر و ئوردن کرد، زۆربەی وڵاتانی عەرەبی و ڕێکخراوە نێودەوڵەتییەکان ئەم پێشنیازەیان ڕەتکردەوە، بۆ ئەم مەبەستەش کۆبوونەوەیەکی تایبەت سەبارەت بەم بابەتە لە قاهیرە کرا.

ڕاگەیێنراوی فەرمی: وەزارەتی دەرەوەی ئیسرائیل ڕەخنە لە دەرئەنجامەکانی ئەم لووتکەیە دەگرێت لەبەرئەوەی نەیتوانیەوە ڕاستییەکانی بزووتنەوەی حەماس بخاتەڕوو، ڕایگەیاند، ''پلانی ئاوەدانکردنەوەکە نەیتوانی ڕاستییەکانی دۆخەکە چارەسەر بکات دوای هێرشەکەی حەماس لە 7ـی ئۆکتۆبەری 2023 کە بووەتە هۆی کوژرانی سەدان ئیسرائیلی.''

بۆچی گرنگە: نوێنەرانی دەوڵەتانی عەرەبی ڕۆژی سێشەممە 2025-04-03، لە قاهیرە کۆبوونەوە، سەبارەت بەمەش میسر پلانێكی ئامادە کردبوو تایبەت بە کەرتی غەززە و لەم لووتکەیەدا گفتوگۆی لەسەر کرا، بەشێکی ئەم پلانەش بریتیی بوو لە ئاوەدانکردنەوەی غەززە لە لایەن شاندێکی حکومڕانی کە کەرتەکە بەشێوەیەکی کاتی بەڕێوەببات و هیچی دیکە حەماس حکومڕانی کەرتەکە نەکات، ئەم پلانەش تێچووی 53 ملیار دۆلار دەبێت هاوکات، دوورکەوتنەوە لە نیشتەجێکردنی فەڵەستینییەکان وەک ترەمپ پێشنیازی کردبوو.

بۆچوونی لایەنی بەرامبەر: حەماس داوای لە سەرکردە عەرەبییەکان کرد کە ئیسرائیل ناچار بکات پابەند بێت بە ڕێککەوتنی ئاگربەست غەززە، هاوکات ستایشی هەڵوێستی وڵاتانی عەرەبی کرد بۆ پلانی ئاوەدانکردنەوەکە.