وەزیری ناوخۆی عێراق: کۆتایی بە بەسەربازگەکردنی شارەکان دەهێنین

ئاڤا نیوز

وەزیری ناوخۆی عێراق دەڵێت، دوای ئەوەی دۆخی ئەمنیی لە پارێزگاکان بەرەوپێشچوونی بەخۆیەوە بینیی و ئاستی تاوان و توندوتیژی کەمبووەتەوە، لە قۆناغی داهاتوودا بەسەربازگەکردنی شارەکان کۆتایی پێدەهێنن و تەنیا هێزی پۆلیسی فریاکەوتن و هاتووچۆ، ئاسایشی ناوخۆ دەپارێزن.

وێنە گەورەکە: کۆتاییهێنان بە بەسەربازگەکردنی شارەکان و تەنیا مانەوەی هێزەکانی ناوخۆ، داواکاریی سەرەکی سوننەکانە، بەهۆی ئەوەی لە دوای کۆتاییهێنان بە داعش ناوەندی پارێزگا سونییەکان زیاتر لە هێزێکی سەربازیدا تیایاندا جێگیرکراون.

لێدوانی فەرمی: عەبدولئەمیر شەمەری، وەزیری ناوخۆی عێراق ڕایگەیاند، "ئێمە هەوڵ بۆ کۆتاییهێنان بە بەسەربازگەکردنی شارەکان و تەنیا مانەوەی هێزەکانی فریاکەوتن و هاتووچۆ لە شەقام دەدەین، لەو چوارچێوەیەشدا پلانی ئەمنیی و بەرنامەی ئاسایشی ناوچەکان لەجێگەی پلانی سەربازیی جێبەجێ دەکەین".

لە لایەکی دیکەوە: بەوتەی فەریق کازم بورهان، ڕاوێژکاری وەزیری ناوخۆی عێراق پڕۆژەکە لەماوەی چەند مانگی داهاتوو دەکەوێتە بواری جێبەجێکردنەوە و دوو ساڵیشە بە ئامانجی جێبەجێکردنی پڕۆژەکە، کار بۆ دابینکردنی ئۆتۆمبێلی نوێ بۆ هێزەکانی پۆلیس و ڕاهێنان بە هێزە ئەمنییەکان دەکەن.