فایلی خەڵک؛ ئاڤا بەدواداچوون بۆ کێشەی هاتووچۆی ژمارەیەک گوندی سنووری چەمچەماڵ دەکات

ئاڤا نیوز

ژمارەیەک گوندی سنووری ناحییەی قادرکەرەم و سەنگاو کێشەی هاتووچۆیان هەیە، بەڕێوەبەری گشتیی ڕێگاوبان و ئاوەدانکردنەوەی سلێمانیش دەڵێت، "با داواکارییەکەیان پێشکەش بکەن و ئیشیان بۆ دەکەین".

چیرۆکی سەرەکی: لەنێوان گوندەکانی قادرکەرەم و سەنگاو چەمی ڕۆخانە هەیە، لە وەرزی زستاندا بەهۆی لافاو و کۆبوونەوەی ئاو هاتووچۆی نێوان گوندەکان دەپچڕێت، گوندەکانی سنووری ناحییەی قادرکەرەم داواکارییان بۆ دروستکردنی پردێک لەسەر چەمی ڕۆخانە بەرزکردووەتەوە، بەڵام وەک خۆیان دەڵێن داواکارییەکەیان پشتگوێخراوە، لە ڕێگەی ئاڤاوە داوا لە حکومەت دەکەن بە دەم داواکارییەکەیانەوە بێت.

لێدوانی فەرمی: ئەندازیار محەممەد جەلیل، بەڕێوەبەری گشتیی ڕێگاوبان و ئاوەدانکردنەوەی سلێمانی، بە ئاڤا میدیای ڕاگەیاند:

- چوار ساڵە لەم پۆستەدام و هیچ داواکارییەکی وام بۆ نەهاتووە، ئەو گوندنشینانە با بە نووسراوێکی نوێ لە ڕێگەی ناحییەی قادرکەرەمەوە ئاراستەی بەڕێوەبەرایەتیی چاککردنی ڕێگاوبانی چەمچەماڵ بکەن بۆ ئەوەی پردێکیان بۆ دروست بکات.

- ئەگەر بەڕێوەبەرایەتیی چاککردنی ڕێگاوبانی چەمچەماڵ نەیتوانی کارەکەیان بۆ بکات، ئەوا نووسراو ئاراستەی ئێمە دەکات و ئێمە کارەکەیان بۆ دەکەین، بەڵام پێویستە نووسراوەکەیان ڕوون بێت کە پردیان دەوێت یان ڕێگاوبان.