ئەمریکا داوا لە عێراق دەکات بەزووترین کات دەستبەرداری غازی ئێران بێت

ئاڤا نیوز

وەزارەتی دەرەوەی ئەمریکا داوا لە عێراق دەکات بە زووترین کات دەستبەرداری سەرچاوەی وزەی ئێران بێت.

چیرۆکی سەرەکی: وادەی لێخۆشبوونی ئەمریکا بۆ هاوردەکردنی غازی ئێران لەلایەن عێراقەوە سبەی شەممە 8-3-2025 کۆتایی دێت و بەو هۆیەشەوە عێراق ڕووبەڕووی قەیرانی کەمیی کارەبا دەبێتەوە.

لێدوانی فەرمی: تامی بروس، وتەبێژی وەزارەتی دەرەوەی ئەمریکا ڕایگەیاند: لەم کاتەدا هیچ پلانێکی نوێمان نییە ڕایبگەیەنین سەبارەت بەو لێخۆشبوونەی به عێراق درابوو بۆ هاوردەکردنی کارەبا و غاز له ئێرانەوە، جگە لەو لێخۆشبوونە نەبێت  لەلایەن دۆناڵد ترەمپ، سەرۆکی ئەمریکا هەڵوەشێنرایەوە.

- وتەبێژی وەزارەتی دەرەوەی ئەمریکا ستایشی ڕۆڵی محەممەد شیاع سوودانی، سەرۆکوەزیرانی عێراق بۆ گەیشتن بە سەربەخۆیی وزە کرد.

ئەوەی پێویستە بیزانیت: پێشتر ئەحمەد مووسا، وتەبێژی وەزارەتی کارەبای عێراق ڕاگەیاند، لێخۆشبوونی ئەمریکا بۆ هاوردەکردنی غازی ئێران لە هەشتی ئازار کۆتایی دێت، بەو هۆیەوە عێراق نزیکەی یەک لەسەر سێی بەرهەمهێنانی کارەبای نیشتمانی لەدەست دەدات.

ئەمەش بزانە: بەدرێژایی چەند ساڵی ڕابردوو، عێراق سوودمەند بووە لە لێبوردنی ئەمریکا لە مامەڵەکردن لەگەڵ ئێران لەبوواری وزەدا، ئەوەش توانای بەرهەمهێنانی هەشت هەزار مێگاوات کارەبای لە ڕێگەی غازی ئێرانەوە بۆ دەستەبەر دەکرد.