باوەڕپێکراوترین پیاوی بنەماڵەی ئەسەد دەستگیرکرا

ئاڤا نیوز

ئاسایشی سووریا دەستگیرکردنی بەرپرسی پێشووی هەواڵگریی ئاسمانی سووریای ڕاگەیاند کە تۆمەتبارە بە تیرۆرکردن لە ماوەی دەسەڵاتی حافز ئەسەد، سەرۆکی پێشووی سووریا.

وێنە گەورەکە: حکومەتی نوێی سووریا لە ئۆپەراسیۆنەکانیان بەردەوامن بۆ دەستگیرکردنی پاشماوەکانی ڕژێمی بەشار ئەسەد و لەو چوارچێوەیەشدا دەیان بەرپرسی پێشووی سووریایان دەستگیرکردووە.

لێدوانی فەرمی: سەرچاوەیەکی ئەمنی سووریا بە ئاژانسی سانای سووریای ڕاگەیاندووە، لیوا ئیبراهیم حەویجە، سەرۆکی هەواڵگریی ئاسمانی پێشووی سووریا لە نێوان ساڵەکانی 1987 بۆ 2002 لە شاری جەبلەی سووریا دەستگیرکراوە.

ئەوەی پێویستە بیزانیت: ئیبراهیم حەویجە تۆمەتبارە بە ئەنجامدانی سەدان ئۆپەراسیۆنی تیرۆرکردن لە سەردەمی بنەماڵەی ئەسەد، دیارترینیشیان تیرۆرکردنی سەرکردەی دروزییەکانی لوبنان کەمال جەنبەلات بوو لە 16ی ئازاری 1977.

ئەوەی لەبارەیەوە دەگوترێت: لە ساڵی حەفتاکەنەوە ئیبراهیم حەویجە پەیوەندی بە سوپای سووریاوە کردووە و لەماوەیەکی کەمدا بووەتە یەکێک لە دیارترین ئەفسەرەکانی هەواڵگریی سووریا و لە ساڵی 1987 پۆستی بەرپرسی هەواڵگریی ئاسمانی سووریای وەرگرتووە و تا ساڵی 2002 لەپۆستەکەی ماوەتەوە، دواتر لە چوارچێوەی هەوڵەکانی بەشار ئەسەد بۆ لاوازکردنی پێگەی سەربازە کۆنەکانی ناو سوپای سووریا بە بڕیارێکی ئەو ئیبراهیم حەویجە لە پۆستەکەی دوورخراوەتەوە.