ئیدارەی خۆسەر بەیاننامەیەکی لەسەر شەڕ و ئالۆزییەکانی سووریا بڵاوکردەوە

ئاڤا نیوز

بەڕێوەبەرایەتیی ئیدارەی خۆسەر لەبارەی شەر و ئالۆزییەکانی نێوان هێزەکانی ئاسایشی سووریا و پاشماوەکانی ڕژێمی بەشار ئەسەد بەیاننامەیەکی بڵاوکردەوە و تێیدا نیگەرانی خۆی بۆ دۆخەکە دەردەبڕێت.

چیرۆکی سەرەکی: بەڕێوەبەرایەتیی ئیدارەی خۆسەر لە باکوور و ڕۆژهەڵاتی سووریا، سەبارەت بە شەڕ و تێکهەڵچوونە بەردەوامەکانی نێوان گرووپە چەکدارەکان و هێزەکانی حکومەتی دیمەشق لە لازقیە، تەرتوس، ئیدلب، حومس و ناوچەکانی دیکەی سووریا، بەیاننامەیەکی بڵاوکردەوە.

ڕاگەیینراوی فەرمی: لە بەیاننامەکەی ئیدارەی خۆسەردا هاتووە،

- "ئێمە وەک ئیدارەی خۆسەر لە باکوور و ڕۆژهەڵاتی سووریا، نیگەرانی خۆمان بۆ ئەو ڕووداوانە دەردەبڕین کە لەو ناوچانە ڕوودەدەن".

- هۆکاری ئەم ململانێیە ئەوەیە کە حکومەتی دیمەشق واقیعی سووریا بە دروستی ناخوێنێتەوە.

- هەستیاری دۆخی سووریا و هەمەجۆریی پێکهاتە و مەزهەبەکان لەبەرچاو نەگیراوە. 

- ئەم شەڕە وڵاتەکە بەرەو کارەسات دەبات و کۆمەڵکوژیی گەلانی سووریای لێ دەکەوێتەوە.

- داوا لە هەموو لایەنەکان دەکەین ژیرانە مامەڵە بکەن و ئەم گرژیانە ڕابگرن.

- ئێمە چەندین جار جەختمان کردووەتەوە لەوەی سووریا پێویستی بە دیالۆگێکی نیشتمانی ڕاستەقینە هەیە، تاوەکو بەرەو ئەمنیەت و چارەسەرکردنی ناکۆکی و کێشەکان بچێت. 

- داوا لە گەلی سووریا دەکەین شوێن ئەو کەسانە نەکەون کە دەیانەوێت شەڕی ناوخۆ لە وڵاتەکە دەستپێبکەن.