ئەمریکا: پێشنیازی میسر سەبارەت بە غەززە لەبەرچاودەگرین

ئاڤا نیوز

 

ستیڤ ویتکۆف، نوێنەری تایبەتی سەرۆکی ئەمریکا بۆ ڕۆژهەڵاتی ناوەڕاست ستایشی میسری کرد بۆ پێشکەشکردنی پلانێکی نوێ سەبارەت بە غەززە، ئەمەش دوای ئەوەی دۆناڵد ترەمپ پێشنیازی کرد ئەمریکا دەستبەسەر غەززەدا بگرێت و دانیشتوانەکەی شارەکە بەجێبهێڵن.

 

لێدوانی فەرمی: ستیڤ ویتکۆف ڕایگەیاند:

-  سەبارەت بە پێشنیازەکەی میسر سەبارەت بە داهاتووی غەززە، لەو بارەیەوە پێویستمان بە گفتوگۆی زیاترە ، بەڵام هەنگاوی یەکەمی نیەتپاکی لەلایەن میسرییەکانەوە نراوە.
-    سەرۆک ترەمپ سەرکەوتوو بووە لە هاندانی خەڵکی دیکەی ڕۆژهەڵاتی ناوەڕاست بۆ پێشکەشکردنی پێشنیاز و دەتوانین لەبەرچاویان بگرین.
-    هەندێک گۆڕانکاری ڕوودەدەن و ڕەنگە بە هاوکاری ئیسرائیل ئەنجام بدرێن بەڵام ئێستا بابەتەکە ڕوون نییە، بەڵام پێموایە حەماس دەرفەتی ئەوەی هەیە بە عەقڵانی مامەڵە بکات و ئەوەی دروستە بیکات، دواتر لە غەززە بکشێتەوە، ئەوان بەشێک نابن لە حکومەتی فەڵەستین.
- سەرۆک ترەمپ دەیەوێت ئاشتی ببینێت لەکاتێکدا ئێمەش شوێن پێی ئەو دەکەوین، ئێمە دەمانەوێت ئاشتی لە ڕۆژهەڵاتی ناوەڕاست ببینین، دەمانەوێت لە ئۆکراینا بیبینین، دەمانەوێت لە سەرانسەری جیهاندا بیبینین.

ئەوەی پێویستە بیزانیت: پڕۆژەکەی میسر و لوتکەی عەرەبی ئەمانە لەخۆدەگرێت:
 
- پارێزگاری لە مافی خەڵکی فەڵەستین دەکەین بۆ مانەوەی لەسەر خاکەکەی.
- لیژنەیەک لە کەسانی فەڵەستینی بێلایەن بۆ بەڕێوەبردنی غەززە لە قۆناغی ڕاگوزەر پێکدەهێنرێت کە ماوەکەی شەش مانگە.
- لەو ماوەیەدا شوێنی نیشتەجێبوونی کاتی بۆ ملیۆنێک و 500 هەزار ئاوارە دروست بکرێت.
- ئاوەدانکردنەوەی غەززە 53 ملیار دۆلاری پێویستە و پێنج ساڵ دەخایەنێت.
- لە دوو ساڵی یەکەمدا 200 هەزار یەکەی نیشتەجێبوون دروست بکرێت.

 

زانیاریی زیاتر: هەر لە پرۆژەکەی میسردا هاتووە، قۆناغی یەکەم 20 ملیار دۆلاری پێویستە، قۆناغی دووەمییش 30 ملیار دۆلاری دەوێت، کە دروستکردنی 200 هەزار یەکەی نیشتەجێبوونی دیکە و فڕۆکەخانەی غەززە لەخۆدەگرێت، لەگەڵ دروستکردنی بەندەری بازرگانیی و ناوەندی تەکنەلۆژیی و هۆتێل لە نزیک کەناراوەکانی غەززە.
 
لەلایەکی دیکەوە: بەگوێرەی پلانەکە، وادەی دەستپێکردنی ئاوەدانکردنەوەی غەززە پەیوەستە بەو پارەیەی بۆی دابین دەکرێت، داوا لە ئەنجوومەنی ئاسایش دەکرێت هێزی ئاشتیپارێز لە غەززە و کەناری ڕۆژئاوا جێگیر بکات.