ڕوانگەی سووری: تا ئێستا زیاتر لە 600 کەس لە دەوروبەری بەنداوی تشرین کوژراون

ئاڤا نیوز

گرووپە چەکدارەکانی نزیک لە تورکیا بە چەکی قورسەوە دەوروبەری بەنداوی تشرین بۆردومان دەکەن و هێزەکانی سووریای دیموکراتیش بەرپەچیان دەدەنەوە.

وێنە گەورەکە: دوای کەوتنی دەسەڵاتی بەشار ئەسەد لە 8ـی 12ـی ساڵی ڕابردوو، شەڕ و ڕووبەڕووبوونەوەکانی نێوان هێزەکانی سووریای دیموکرات "هەسەدە" و گرووپەکانی نزیک لە تورکیا، لە منبج و دەوروبەری بەنداوی تشرین بەردەوامە.

زانیاریی زیاتر: بە گوێرەی میدیاکانی نزیک لە هێزەکانی سووریای دیموکرات، ئەمرۆ هەینی، دەوروبەری بەنداوی تشرین بەچڕی لەلایەن گرووپەکانی نزیک لە تورکیاوە بۆردومان کراوە.

ڕاگەیینراوی فەرمی: بەپێی ڕاگەیێندراوی ڕوانگەی سووری بۆ مافەکانی مرۆڤ، لە 12-12- 2024ـەوە، هێرشی گرووپەکانی نزیک لە تورکیا بۆ سەر هەسەدە لە دەوروبەری بەنداوی تشرین دەستی پێکردووە و تاوەکو ئێستا 635 کەس کوژراون.

٠ لەو ژمارەیە 56 کەسیان مەدەنی بوون، کە حەوت ژن، چوار منداڵ و ڕۆژنامەنووسێکشیان تێدایە.

٠ 471 چەکداری گرووپەکانی نزیک لە تورکیا کوژراون، کە یەکێکیان ئەفسەرە لە سوپای تورکیا.

٠ لە ئەنجامی هێرشی زەمینی و فرۆکەی بێفرۆکەوانەوە، 104 ئەندامی هەسەدە گیانیان لەدەستداوە.

٠ چوار ئەندامی سوپای تورکیا کوژراون.