وەزارەتی دارایی بۆ ئاڤا: سەرەتای ئەم هەفتەیە پارەی مووچە دەگات

 

ئاڤا نیوز

هەموو ڕێکارەکانی پەیوەست بە ناردنی مووچەی مانگی دوو تەواوبوون و بەغدا هیچ تێبینییەکی لەسەر لیستی مووچە و بابەتەکانی پەیوەست بە مووچە نەماوە و تەنیا ئەوەندە ماوە، وەزارەتی دارایی عێراق نووسراو بۆ بانکی ناوەندیی عێراق بکات بۆ ئەوەی پارە بۆ هەرێمی کوردستان بنێردرێت، ئەمەش چاوەرێدەکرێت لەگەڵ دەستپێکردنەوەی دەوام لە ڕۆژی یەکشەممە نووسراوەکە بنێردرێت و مووچەی مانگی دوو خەرج بکرێت.

چیرۆکی سەرەکی: شاندی تەکنیکی وەزارەتی دارایی و ئابووریی کوردستان هەشت ڕۆژ لە بەغدا مانەوە و دوێنی پێنج شەممە گەڕانەوە هەولێر، بە گوتەی ئەندامێکی شاندەکە وەڵامی هەموو ئەو پرسیارانەیان داوەتەوە کە تەیف سامی و بەڕێوەبەرە گشتییەکان لەسەر لیستی مووچە هەیانبووە و ئێستا هیچ شتێک نەماوە و هەموو ڕێکارەکان تەواوبوون.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤا میدیای ڕاگەیاند، چاوەڕێ دەکەین سەرەتای ئەم هەفتەیە لەگەڵ دەستپێکردنەوەی دەوام بەغدا پارەی مووچە بنێرێت، بە گەیشتنی پارەکەش ڕێکارەکانی دابەشکردنی ئاسانە و بەزوویی خشتەی دابەشکردنی مووچە ڕادەگەیەنین و لە چەند ڕۆژێکدا مووچەی هەموو وەزارەتەکان دابەشدەکرێت.

گوتیشی، هەموو چاوەڕوانییەکانیش بۆ ئەوەن ئەم هەفتەیە دابەشکردنی مووچە دەستپێبکات و هەموو فەرمانبەرانی هەرێمی کوردستان مووچە وەربگرن.