شەشەمین مینحەی مانگانەی ڕزگاربووانی دەستی داعش دابەش دەکرێت

ئاڤا نیوز

 

حكومەتی هەرێمی كوردستان دەستیكرد بە دابەشكردنی شەشەم مینحەی مانگانەی سەرۆكوەزیران مەسرور بارزانی، بۆ هاووڵاتیانی ئێزدیی ڕزگاربووی دەستی داعش.

 

وێنە گەورەكە: ئەمڕۆ شەممە 8-3-2025، لە بنكەی ڕۆشنبیری و كۆمەڵایەتیی لالش، پێشینەی مانگی شوبات بە ڕزگاربووانی دەستی داعش بەخشرا كە شەشەمین پێشینە بوو پێیان بدرێت.

 

ئەوەی پێویستە بیزانیت: دابەشكردنی مینحەكە لە ئەمڕۆ شەممەوە دەستی پێكرد و تاوەكو ڕۆژی چوارشەممە بەردەوام دەبێت، سوودمەندبووان دەتوانن لە سەرجەم نووسینگەكانی بنكەی لالش لە شێخان، كۆمەڵگەی شاریا، ناوچەی خانكێ و كۆمەڵگەی دیرابۆن و بنكەی سەرەكی لالش، پاداشتەكانیان وەربگرن.

 

ڕاگەیێنراوی فەرمی: بنکەی ڕۆشنبیری و کۆمەڵایەتیی لالش، لە ڕاگەیێنراوێكدا ئاماژەی بەوەكردووە، مینحەی مانگانە بەسەر سێ هەزار و 574 كوردی ئێزدی دابەش دەكرێت كە لەژێر دەستی داعش ڕزگار كراون.

 

بۆچی گرنگە: سەرۆكوەزیران مەسرور بارزانی، لە سۆنگەی باشتركردنی دۆخی ژیانی هاووڵاتیانی ئێزدی بەتایبەت ئەو ڕزگاربووانەی لەوەتەی ساڵی 2014 لەلایەن تیرۆرستانی داعش ڕفێندرابوون، بڕیاریدا بە تەرخانكردنی مینحەی مانگانە بۆیان، بەڵێنیشی داوە لەگەڵ باشتربوونی دۆخی ئابووریی هەرێمی کوردستان، مینحەکە باشتر دەبێت و پرۆژە و خزمەتگوزاریی زیاتر پێشکەشی ڕزگاربووانی ئێزدیی دەكرێت.