شیعەکان لەسەر هەڵوەشاندنەوەی گروپەکان و ڕێکخستنەوەی حەشدی شەعبی ڕێکدەکەون

ئاڤا نیوز

تا دێت شیعەکانی عێراق باریان زیاتر لاردەبێت و بەهۆی زیادبوونی فشارەکانی ئەمریکاش، ڕێککەوتوون گرووپەکانی مقاوەمە هەڵبوەشێننەوە و پەیکەربەندی حەشدی شەعبیش ڕێكبخەنەوە، پێدەچێت ئەندامەکانیان لەگەڵ وەزارەتەکانی بەرگریی و ناوخۆ تێکەڵ بکرێن.

ئەوەی پێویستە بیزانیت: ئەمریکا زیاتر لە جارێک هۆشداری بە بەرپرسانی عێراق داوە تا  گرووپەکانی مقاوەمە کۆنترۆڵ بکەن و لە چەک دایانبماڵن، بەوتەی عيزەت شابەندەر، كەسایەتی سیاسیی شیعە "ئەمریکا، عێراقی لە پێویستیی هەڵوەشاندنەوەی حەشدی شەعبیش ئاگادار کردووەتەوە".

لێدوانی فەرمی: سەلام زوبەیدی، وتەبێژی هاوپەیمانی نەسر ڕایگەیاند:

- گرووپەکان هێزی دەرەوەی دەوڵەتن و چەکەکانیان کۆنترۆڵنەکراوە، بەڵام حەشدی شەعبی دامەزراوەیەکی سەربازییە لەژێر فەرماندەیی فەرماندەی گشتی هێزە چەکدارەکان دایە.

- حەشدی شەعبی پێویستی بە ڕێکخستنەوە هەیە و دەکرێت ئەندامەکانی ببنە بەشێک لە وەزارەتەکانی بەرگریی و ناوخۆ.

- بوونی گرووپە چەکدارەکان بۆ ڕووبەڕووبوونەوەی داگیرکار و گروپە تیرۆرستییەکان بووە، سەرۆکوەزیران و سەرکردەکانی چوارچێوەی هەماهەنگی جەختیانکردووەتەوە کە چیتر پاساوی بوونی ئەو گرووپانە نەماوە، چونکە دامەزراوە سەربازییەکانی وڵات توانای ڕووبەڕووبوونەوەی هەر هەڕەشەیەکیان هەیە کە بۆ عێراق دێتە پێش.

- سەرکردەکانی چوارچێوەی هەماهەنگی کۆدەنگن لەسەر ئەوەی نابێت گرووپی چەکداری لە دەرەوەی دەوڵەت هەبێت، سەرکردەی گرووپەکانیش ئامادەییان دەربڕیوە بێنە ناو دامەزراوە سەربازییەکان و حەشدی شەعبی.

- فشاری ئەمریکا بوونی هەیە، بەڵام ئەو وڵاتە نەچووەتە ناو وردەکارییەکان و تەنیا دەیەوێت گرووپەکان نەمێنن کە وەڵامی فەرماندەی گشتی هێزە چەکدارەکان نادەنەوە و هێرش دەکەنە سەر بنکەکانی ئەمریکا، هاوکات ئەمریکا دەیەوێت ڕۆڵی ئەو گرووپانە کۆتایی پێبهێنێت بەهۆی ئەوەی لە ژێر کاریگەری ئێران دان و ئەوەش کاریگەری لەسەر بەرژەوەندییەکانی ئەمریکا لە عێراق هەیە.