شابەندەر: ئەمریکا، عێراقی لە پێویستیی هەڵوەشانەوەی حەشدی شەعبی ئاگادار کردووەتەوە

ئاڤا نیوز

 

كەسایەتییەکی سیاسیی شیعە لە عێراق دەڵێت، ئیدارەی ترەمپ عێراقی لە پێویستی هەڵوەشانەوەی حەشدی شەعبی و داماڵینی چەک لە دەستی گرووپە چەکدارەکان ئاگادار کردووەتەوە، جەختیش دەکاتەوە کە عێراق لەناو هێڵی سووری ئەمریکادایە.

 

ئەوەی پێویستە بیزانیت: حەشدی شەعبی دامەزراوەیەکی سەربازیی عێراقە و ئەندامەکانی لە پێکهاتەی شیعەن، سەرەتا وەک هێزێکی خۆبەخش بۆ شەڕی دژی داعش دروستبوون، بەڵام دواتر لە پەرلەمانی عێراق یاسای بۆ دەرچوو و ئێستا ئەو هێزە نزیکەی 4.5 ترلیۆن دیناری لە بودجەی گشتی بۆ دیاریکراوە و 238 هەزار چەکداریشی هەیە.

 

لێدوانی فەرمی: عيزەت شابەندەر، كەسایەتی سیاسیی شیعە لە عێراق لە چاوپێککەوتنێکدا لەگەڵ کەناڵی دیجلە ئاماژە بەوەکرد: عێراق لەناو هێڵی سووری ئەمریکادایە لەگەڵ ئەو وڵاتانەی پشتیووانی مقاوەمەی غەززە دەکەن.ئەمریکا هۆشداری بە عێراق داوە کە دەبێت چەک لە دەستی گرووپەکانی مقاوەمە دابماڵرێت.

 

زانیاریی زیاتر: ئەو کەسایەتییە ئاینییەی شیعە دەشڵێت، ئەمریکا هۆشداری داوە کە حەشدی شەعبیش نابێت وەک دامەزراوەیەک بمێنێتەوە و پێویستە ئەندامەکانی وەک پۆلیسی هاتووچۆ و ئاگرکوژێنەوە و پاسەوان لە دەزگاکانی دیکە جێگەیان بکرێتەوە، واتە ئەمریکا دەڵێت ئەندامانی حەشدی شەعبی چۆن پەرتوبڵاویان دەكەن، بیكەن.