نووری مالیکی: کار بۆ گەڕاندنەوەی سەدر دەکرێت

ئاڤا نیوز

نووری مالیکی ڕایدەگەیێنێت، لە ئێستاوە کار بۆ ئەوە دەکرێت ڕەوتی سەدر بگەڕێتەوە و بەشداریی هەڵبژاردنەکانی داهاتوو بکات.

لێدوانی فەرمی: نووری مالیکی، سەرۆکی هاوپەیمانی دەوڵەتی یاسا بە ئاژانسی هەواڵی عێراقییەی ڕاگەیاندووە، لەنێو چوارچێوەی هەماهەنگی بڕیارنییە یاسای هەڵبژاردن هەموار بکرێت، هەندێک بۆچوون هەن، بەشێکیان دەڵێن هەڵبژاردن فرەبازنەیی بێت و هەندێکی دیکەش پێیان باشە یەک بازنەیی بێت.

زانیاريی زیاتر: مالیکی ئاماژەی بۆ ئەوە کردووە زانیارییان هەیە کار بۆ ئەوە دەکرێت ڕەوتی سەدر بەشداری هەڵبژاردنەکانی داهاتوو بکات.

باکگراوند: دوایین هەڵبژاردنی پەرلەمانی عێراق ساڵی 2021 کرا و هەڵبژاردنی داهاتووش دەکەوێتە ساڵی 2025، لەو هەڵبژاردنەدا رەوتی سەدر زۆرترین کورسی بەدەستهێنا، بەڵام بەهۆی فشارە ناوخۆیی و دەرەکییەکان لەبارەی پێکهێنانی حکومەت بەیەکجاری لە پرۆسەی سیاسی کشایەوە. 

لەلایەکی دیکەوە: لەبارەی هەڵبژاردنی سەرۆکی پەرلەمانی و ناکۆکی لایەنە سوننەکان مالیکی ڕایگەیاندووە، لایەنە سیاسییەکان نیازی جددیان هەیە بۆ کۆتاییهێنان بەم دۆسیەیە، چوارچێوەی هەماهەنگی بە لایەنە سوننەکانی گوتووە لەسەر یەک بەربژێر ڕێکبکەون، بەڵام پێشبینی دەکرێت زیاتر لە بەربژێرێکیان هەبێت.

گۆشەیەکی دیکە: مالیکی جەختیی کردووەتەوە کاردەکەن بۆ ئەوەی ئاگربەستی نێوان گرووپە چەکدارەکان و ئەمریکا بەردەوامبێت، بۆ ئەوەی دەرفەت بدرێت بە حکومەت سەرپەرشتی دانوستاندنەکان لەگەڵ ئەمریکا بکات بۆ دانانی خشتەیەک بۆ کشانەوەی هێزەکانی ئەمریکا.