بەهۆی بەردەوامی گرژییەکان 158 کەسی دیکە لە سووریا کوژران

ئاڤا نیوز

گرژیی و ئاڵۆزییەکان لە پارێزگا کەناراوییەکانی سووریا بەردەوامییان هەیە و ڕۆژ بە ڕۆژیش ئاماری کوژراوان بەرزبوونەوەی زیاتر بەخۆیەوە دەبینێت، تاوەکو ئێستاش جگە لە کوژراوانی هەردوو بەرەی شەڕ، هەزار و 383 هاووڵاتی سڤیل کوژراون.

وێنە گەورەکە: ئەگەرچی لە 10ـی ئازارەوە وەزارەتی بەرگریی سووریا، کۆتاییهاتنی ئۆپەراسیۆنە سەربازییەکانی لە پارێزگاکانی لازقیە و تەرتووس بە "سەرکەوتویی" ڕاگەیاند، ڕۆژێک پێشتریش ئەحمەد شەرع، سەرۆککۆماری سووریا بۆ قۆناغی ڕاگوزەر، بڕیاری پێکهێنانی لیژنەیەکی بۆ لێکۆڵینەوە لە ڕووداوەکان دا، بەڵام کوشت و بڕ لە کەناراوەکانی سووریا هەر بەردەوامە.

زانیاریی بەدەستهاتوو: بە گوێرەی ڕوانگەی سووری بۆ مافەکانی مرۆڤ، بەهۆی گرژییەکانی 6ی ئازارەوە تا ئێستا هەزار و 383 هاووڵاتی سڤیل گیانیان لەدەستداوە.

ژمارەکانی وادەڵێن: بەگوێرەی ئامارەکانی ڕوانگەی سووری، ئەمڕۆ چوارشەممە 13-3-2025، سێ کۆمەڵکوژی لە پارێزگاکانی تەرتووس، لازقییە و حەما تۆمارکران و 158 هاووڵاتی سڤیل کوژراون کە زۆرینەیان عەلەوی بوونە.

ئاماری کۆمەڵکوژییەکان لە 6ـی ئازارەوە:

- ژمارەی کۆمەڵکوژییە بەڵگەدارەکان: 50 کۆمەڵکوژی لە کەناراوەکانی سووریا و ناوچە شاخاوییەکان.

کۆی گشتی قوربانییەکان بەپێی پارێزگاکان:

- لازقیە: 683 کەس

- تەرتووس: 433 کەس

- حەما: 255 کەس

- حمس: 12 کەس

مەترسییە پێشبینیکراوەکان: ڕوانگەی سووری بۆ مافەکانی مرۆڤ هۆشداری لە پراکتیزەکردنی ناشتنی قوربانییەکان لە گۆڕە بەکۆمەڵەکان لە کەناراوەکانی سووریا دەدات و ڕایدەگەیێنێت:

- ترسمان لەوە هەیە ئەم گۆڕانە دواتر وەک پڕوپاگەندە بەکاربهێنرێن کە خزمەت بە ئەجێندای سیاسی و مرۆیی دەکەن، تۆمەتبارکردنی بەناو "پاشماوەکانی ڕژێم" بە ئەنجامدانی تاوانی جەنگ.

- داواکارییە نێودەوڵەتی و ناوخۆییەکان: ڕوانگەی سووری داوای لە کۆمەڵگەی نێودەوڵەتی دەکات خێرا لێکۆڵینەوە لە پێشێلکارییەکان بکەن و تیمی سەربەخۆی بەڵگەنامەسازی بنێرن.

- داوا لە دەسەڵاتدارانی سووریا دەکەین لێپرسینەوە لەگەڵ ئەو کەسانە بکەن کە دەستیان لە کوشتنەکاندا هەیە، هۆشداریش دەدەین لەوەی ئەگەر ئەوانەی دەستیان هەبووە سزا نەدرێن مەترسی لەسەر سەقامگیری کۆمەڵگە دروست دەکات.