حەماس: پێشوازی لە کشانەوەی ترەمپ بۆ پێشنیازی ڕاگواستنی فەڵەستنییەکان دەکەین

 

 

ئاڤا نیوز

حەماس پێشوازیی لە پاشەکشەی دۆناڵد ترەمپ، سەرۆکی ئەمریکا لە بانگەوازی ڕاگواستنی دانیشتوانی کەرتی غەززە دەکات.

چیڕۆکی سەرەکی: بە مەبەستی نۆژەنکردنەوەی غەززە دوای وێران بوونی بەهۆی جەنگەوە، دۆناڵد ترەمپ سەرۆکی ئەمریکا پێشنیازی ڕاگواستنی دانیشتووانەکەی بۆ وڵاتانی عەرەبی وەک میسر و ئوردن کرد، بەڵام لەلایەن هەردووک وڵاتەوە بەفەرمی ڕەتکرایەوە. 

 

لێدوانی فەرمی: حازم قاسم، وتەبێژی بزووتنەوەی حەماس ڕایگەیاند، ''ئەگەر لێدوانەکانی دۆناڵد ترەمپ سەرۆکی ئەمریکا ڕەنگدانەوەی پاشەکشەی ئەو بێت لە ئاوارەبوونی دانیشتووان، ئێمە ئەوە بەرز دەنرخێنین، داوایشی لە ترەمپ کرد فشار بخاتە سەر ئیسرائیل بۆ جێبەجێکردنی تەواوی ڕێککەوتنی ئاگربەست لە غەززە''.

زانیاریی بەدەستهاتوو: ترەمپ لەگەڵ مایکڵ مارتن، سەرۆکوەزیرانی ئێرلەندا کۆوویەوە و جەختی لەوەکردەوە، کە نایەوێت فەڵەستینییەکان لە غەززە دەربکات، ئەم قسەیەش ڕاستەوخۆ پێچەوانەی بیرۆکەیەتیی کە سەبارەت بە کەرتی غەززە پێشکەشی کردبوو.

لە لایەکی دیکەوە: ستیڤ ویتکۆف نێردراوی ئەمریکا لە ڕۆژهەڵاتی ناوەڕاست لەگەڵ وەزیرانی دەرەوەی وڵاتانی عەرەبی لە دەوحە کۆبوویەوە، پەسەندکردنی پلانی عەرەبی بۆ بوونیادنانەوەی کەرتی غەززە و ئاگربەست و چارەی دوو دەوڵەت دووپاتکرایەوە.

ئەوەی پێویستە بزانیت: لە 4-3-2025، وڵاتانی ئەندامی کۆمکاری عەرەبی پلانی میسریان بۆ ئاوەدانکردنەوەی کەرتی غەززە پەسەندکرد بەبێ ئاوارەبوونی دانیشتووانەکەی، کە تێچووی ئەم پلانە 53 ملیار دۆلار دەبێت.