ئەنجوومەنی سەندیکای پارێزەران هەڵوەشانەوەی خۆی ڕاگەیاند

 

ئاڤا نیوز

ئەنجوومەنی سەندیکای پارێزەرانی عێراق پێش وادەی بەڕێوەچوونی هەڵبژاردن بۆ ئەنجوومەنەکە هەڵوەشاندنەوەی خۆی ڕاگەیاند.

چیرۆکی سەرەکی: ئەنجوومەنی سەندیکای پارێزەران کۆبوونەوەی خولی خۆی بەبێ ئامادەبوونی نەقیبی سەندیکا و جێگرەکەی ئەنجامدا. لە کۆبوونەوەکە تاوتوێی لێکەوتەکانی کۆبوونەوەی ساڵانەی دەستەی گشتی سەندیکای پارێزەران کرا کە لە 2025-03-06، بەڕێوەچوو بۆ دەنگدان بە ژمێرەی کۆتایی بودجەی ساڵانی "2022-2023-2024" هاوکات دەنگ لەسەر بودجەی سێ ساڵەی داهاتوو بدرێت.

نووسراوی فەرمی: بەگوێرەی نووسراوێکی سەندیکاکە، لە کۆبوونەوەکە چەند بڕیارێک دراون، لەوانە:

٠ هەڵوەشاندنەوەی ئەنجوومەنی سەندیکا و جێبەجێکردنی دەقی مادەی 93/3ـی یاسای پارێزەران، داوا دەکات لیژنەیەک پێکبهێنرێت کە لە پێنج ئەندام پێکهاتبێت، کە دوو کەسیان دادوەرن و سێ کەسیان ئەندامی ئەنجوومەنی گشتین کە مەرجەکانی ئەندامێتییان تێدایە.

٠ دواخستنی وادەی هەڵبژاردن، کە بڕیاربوو ڕۆژی دووشەممە 24ـی ئازاری 2025 بەڕێوەبچێت و دیاریکردنی وادەیەکی دیکە بۆ ئەنجامدانی، بەو پێیەی هەڵوەشاندنەوەی ئەنجوومەن خەرجی بۆ هەڵبژاردن و ڕێکخستن مەحاڵ دەکات، ئەمەش دەبێتە هۆی بۆشایی دەسەڵاتەکانی ئەنجوومەن و سەندنەوەی دەسەڵاتەکانی بەهۆی هەڵوەشاندنەوە.

ئەوەی پێویستە بیزانیت: لە میانی کۆبوونەوەی ساڵانەی دەستەی گشتی سەندیکای پارێزەرانی عێراق، شەڕ و پێکدانان و ناڕەزایی لەنێوان پارێزەران دروستبوو بەهۆی گومانی بوونی گەندەڵی لە حیسابی سەندیکا، ئەمەش وایکرد دەنگ لەسەر بودجەکە نەدەن. دواتر وردەکاریی بوجەکە ئاراستەی دادگای لێکۆڵینەوەی کەرخی تایبەتمەند لە دۆسیەکانی دەستپاکی کرا بۆ لێکۆڵینەوە.