شەیبانی: پێویستە سووریا و عێراق ڕێگە نەدەن دەستوەردان لە کاروباری ناوخۆییان بکرێت

ئاڤا نیوز

ئەسعەد شەیبانی، وەزیری دەرەوەی سووریا لە کۆنفرانسێکی ڕۆژنامەوانی دووپاتی کردەوە، کە پێویستە عێراق و سووریا بە تووندی لەبەردەم هەر دەستوەردانێک لە کاروباری ناوخۆییان بوەستنەوە، جەختیشی کردەوە، هاوبەشیی هەردوو وڵات یارمەتیدەر دەبێت لە بونیادنانەوەی ناوچەکە.

چیرۆکی سەرەکی: دوای نیوەڕۆی ئەمڕۆ هەینی، ئەسعەد شەیبانی، وەزیری دەرەوەی سووریا بە سەردانێکی فەرمی گەیشتە بەغدا و لەگەڵ فوئاد حوسێن، هاوتا عێراقییەکەی و سەرۆککۆمار  وسەرۆکوەزیرانیش کۆبووەوە.

لێدوانی فەرمی: ئەسعەد شەیبانی، وەزیری دەرەوەی سووریا لە کۆنگرەیەکی هاوبەشی ڕۆژنامەوانی لەگەڵ هاوتا عێراقییەکەی ڕایگەیاند:

٠ ئێمە ئامادەین هاوکاریی عێراق بین لە ڕووبەڕووبوونەوەی داعش بە درێژایی سنووری نێوانمان و پێویستە هەوڵ بدەین ئەو ڕێکخراوە لەناو ببەین.

٠ ئاسایشی عێراق ئاسایشی سووریایە و بەپێچەوانەوەش.

٠ ئێمە پابەندین بە ئاسانکاری بۆ گواستنەوەی کاڵا و خزمەتگوزاری و وەبەرهێنان لەگەڵ عێراق، سەردانەکەمان بۆ عێراق ئامانجی بەرزکردنەوەی ئاڵوگۆڕی بازرگانی و لابردنی بەربەستەکانی نێوان هەردوو وڵاتە.

٠ سووریا وەک هاوبەشێک سەیری عێراق دەکات لەم قۆناغەدا، پێویستە هاوکاری ئابووری لەگەڵ عێراقدا بوونیاد بنێنینەوە.

زانیاریی زیاتر: شەیبانی یەکەم بەرپرسی باڵای سووریایە لە حکومەتی نوێی ئەو وڵاتە سەردانی عێراق بکات، لە گەشتەکەیدا دوای کۆبوونەوەی لەگەڵ هاوتا عێراقییەکەی لەگەڵ محەممەد شیاع سوودانی، سەرۆکوەزیران و لەتیف ڕەشید، سەرۆککۆمار و مەحموود مەشهەدانی، سەرۆکی پەرلەمانی عێراق کۆبووەوە.