ئەنجوومەنی هەماهەنگی سیاسی و ڕاوێژکاری سووری عێراقی دادەمەزرێت

 

ئاڤا نیوز

بەرپرسی کاروباری کۆماری عێراق لە دیمەشق ڕایدەگەیێنێت، لە ڕۆژانی داهاتوودا شایەتی باشتربوونی پەیوەندییە دووقۆڵییەکانی نێوان سووریا و عێراق دەبن، لە بارەی چالاککردنی هاوکارییە هاوبەشەکان لە هەموو ئاستەکاندا.

چیرۆکی سەرەکی: دوای نیوەڕۆی ڕۆژی هەینی 2025-03-14، ئەسعەد شەیبانی، وەزیری دەرەوەی سووریا بە سەردانێکی فەرمی گەیشتە بەغدا و لەگەڵ فوئاد حوسێن، هاوتا عێراقییەکەی و سەرۆککۆمار وسەرۆکوەزیرانیش کۆبووەوە.

لێدوانی فەرمی: یاسین شەریف حەجیمی، بەرپرسی کاتیی کاروباری کۆماری عێراق لە دیمەشق ستایشی دیداری ئەم دواییەی سەرۆککۆماری عێراق و ئەسعەد شەیبانی وەزیری دەرەوەی سووریای کرد کە ئامانجی پتەوکردنی پەیوەندییە دووقۆڵییەکانی نێوان هەردوو وڵات بوو.

لە ئەنجامی کۆبوونەوەکەدا ڕێککەوتنێک بۆ دامەزراندنی ئەنجوومەنی هەماهەنگیی سیاسی و ڕاوێژکاری سووری عێراقی لە نێوان هەردوو وڵاتدا کراوە، ئێستادا کار لەسەر ئامادەکردنی کارنامەیەک بۆ ئەم ئەنجوومەنە دەکرێت.

هەرکات کارنامەکە تەواو بوو، دەخرێتە بەردەم لایەنە پەیوەندیدارەکان لە هەردوو وڵات بۆ ئەوەی بە فەرمی پەسەند بکرێت و لە بەرژەوەندی هەردوو وڵاتدا جێبەجێ بکرێت.

ئەمەش بزانە: دوای کۆتاییهاتنی کۆبوونەوەکەیان، فوئاد حوسێن، وەزیری دەرەوەی عێراق لە کۆنگرەیەکی ڕۆژنامەوانی هاوبەشدا ڕایگەیاند: لەگەڵ هاوتا سوورییەکەی تاوتوێی پێکهێنانی ژووری ئۆپەراسیۆنی هاوبەشیان بۆ ڕووبەڕووبوونەوەی داعش کردووە.